“Metallurg-W”da “Yuventus de Yopugon” o'yinchisi ko'rikdan o'tmoqda

Ayollar futboli tarixida. Yangi mavsumga hozirlik ko'rayotgan Bekobodning “Metallurg-vumen” jamoasi tarkibiga Kot d’ Ivuarlik o'yinchi kelib qo'shildi. Uning ismi sharifi N’Dnege Periale Rozaxarin Kabrini. 1993 yilning 4 fevralida tavallud topgan. Ampluasi – yarim himoyachi.

O'zbekistonga tashrifiga qadar Kot d’ Ivuarning “Yuventus de Yopugon” jamoasida to'p surgan. Kot d’ Ivuarning etakchi jamoasiga 2013-2014 yilgi mavsumdan o'tgan. SHu vaqt ichida to'rt karra Kot d’ Ivuar chempioni, bir marta vice-chempioni bo'lgan. Federaciya kubogi, mamlakat kubogi sohibi bo'lgan. SHu o'rinda Kot d’ Ivuar ayollar chempionatida 14 ta jamoa ishtirok etishini aytib o'tmoqchimiz.

Yoshligidan Kot d’ Ivuar terma jamoalari murabbiylari etiborida. U-20 Jahon chempionati saralash bosqichida (2013-2014), Kanadada bo'lib o'tgan Jahon chempionati saralash raundida (2013-2014) Kot d’ Ivuar terma jamoasi sharafini himoya qilgan. 2018 yili G'arbiy Afrika futbol federaciyalari kubogi musobaqasida qatnashish uchun milliy terma jamoaga jalb etilgan.

N’Dnege “Metallurg-vumen” murabbiylariga maqul kelsa u bilan shartnoma imzolanadi. Bunaqasi o'zbek futboli tarixida birinchi marta sodir bo'ladi.