“Metallurg” nazorat uchrashuvida “Bunyodkor”dan ustun keldi

Murosasiz kurashlar ostida o'tgan o'yin bekobodliklarning kichik hisobdagi g'alabasi bilan yakunlandi – 1:0. O'yin taqdirini Islom Isoqjonov tomonidan kiritilgan yagona gol hal etdi.

Bevosita tafsilotlarga to'xtaladigan bo'lsak, uchrashuv poytaxt viloyati vakillarining ustunligi bilan boshlandi. Dastlabki daqiqalardanoq maydon markazi hamda to'p nazoratini o'z qo'liga olgan bekobodliklar mezbonlar darvozasi oldida birin ketin xavfli vaziyatlarni barpo etishdi. Birinchi gollik imkoniyatdan tajribali Server Jeparov foydalana olmagan bo'lsa, keyingi hujumda Islom Isoqjonov darvozabon bilan yakkama yakka chiqib, vaziyatni ko'kka sovurdi. Ammo oradan hech qancha vaqt o'tmay Islom o'z xatosini tuzatdi. Jamoaning rossiyalik legioneri Sergey Tumasyan o'ng qanotdan ajoyib reydni amalga oshirdi va to'pni jarima maydoniga etkazib berdi. Himoyachilardan chaqqonroq harakat qilgan Isoqjonov birinchi urinishda to'pni o'ziga to'g'rilab oldi, ikkinchi urinishda esa darvozasining olis pastki burchagini nishonga oldi – 1:0.

SHundan keyin ham “Metallurg” futbolchilari ko'plab vaziyatlarni yaratishdi. Ammo hisob o'yin oxirigacha o'zgarmay qoldi. Ikkinchi taymda “Metallurg” tarkibida bir qator o'zgarishlar bo'lganligi bois “qaldirg'ochlar” ancha faollashishdi. Biroq mezbonlarning xavfli hujumlari chog'ida “Metallurg” himoyachilari va darvozabonning ishonchli o'yini g'alabaning saqlab qolinishiga zamin yaratdi. Bugungi o'yindan keyin “Metallurg” futbolchilariga ikki kunlik dam berildi. Jamoa 25 fevraldan yig'inni davom ettiradi.

“Metallurg” – “Bunyodkor” – 1:0 (1:0). Nazorat uchrashuvi. “Bunyodkor” akademiyasi maydoni.
Hakamlar: Aziz Asimov, Alisher Usmonov, Ruslan Serazetdinov.
Gol: Islom Isoqjonov (14).
“Metallurg”: Zafar Safaev (Akmal Tursunboev, 46),  Ibrohim Yo'ldoshev (Xudoyshukur Sattorov, 70),  Abbos Otaxonov,  SHavkat Mullajonov,  Andrey SHipilov,  Muhammad Isaev (Doniyor Usmonov, 46),  Muzaffar Muzaffarov,  Stanislav Andreev, Server Jeparov, Islom Isoqjonov (Abror Toshqo'ziev, 57), Sergey Tumasyan (Bahodir Pardaev, 46).