Messi bilan hazillashgan O'rinboev

Messining "bazasida" Farhod Nishonov shogirdlari maydon egalariga qarshi ikkita nazorat o'yinida maydonga tushdilar. Bitta mag'lubiyat, bitta durang, safar uchun yaxshi natija.

SHu bois, terma jamoa sardori Muhammadali O'rinboevga aloqaga chiqdik.

"Argentinaga qarshi ikkita o'yinimiz sermazmun bo'ldi. Birinchisida mag'lubiyatga uchradik, lekin o'yinda to'liq ular ustun bo'ldi deb aytmagan bo'lardim. Farqimiz, ular gol urishdi. Osiyo Kubogi oldidan murabbiyimiz turli uslublarni sinab olyaptilar, masalan bu o'yinda biz raqib "zonasi"da pressing qilib o'ynadik. Bunday kuchli jamoaga qarshi bu uslubni hamma ham qo'llayvermaydi. Sekin sekin maqsadimizga erishib boramiz. Ikkinchi o'yinda ko'p narsa o'xshadi va biz durang qayd etdik.

Messining kelishini to'g'rini hech kim kutmagan, ammo biz uchun qiziqarli bo'ldi. U ko'pchilikning orzusidagi futbolchi. O'yindan keyin unga Sen dunyoning eng yaxshi futbolchisisan, ikkinchisi kimligini bilasan desam, o'zi ham kulib yubordi", - deydi terma jamoa sardori.

Kelayotgan Osiyo Kubogi oldidan esa O'rinboev shunday deydi:
"Bu kabi raqiblar bilan Osiyo chempionatiga tayyorgarlik olib borish qiziqarli va tajribaga boy. Buning uchun O'FA mutasaddilariga jamoadoshlarim nomidan minnatdorchilik bildiraman, biz ham akalarimiz izidan borib Sizlarni xursand qilishga harakat qilamiz", - dedi O'rinboev.