"Mashal"da moldovalik legioner ko'rikdan o'tadi

4 yanvar kuni jamoamiz "O'zbekiston" mehmonxonasida yig'iladi. Tayyorgarlikni qolgan qismi Yangierda davom etadi. 18 yanvargacha davom etadigan yig'inga bir necha legionerlar taklif etilgan. Jamoaga tashrif buyuradigan barcha legionerlar ko'rikda bo'ladi.

Avvalgi xabarlarimizda jamoaning ikkinchi yig'iniga "Lokomotiv" va "Neftchi" klublarida harakat qilgan Aleksandr Onika ham kelishini malum qilgan edik.  Ana shunday legionerlardan yana biri moldovalik futbolchi Igor Kostrovdir.

Ushbu yarim himoyachi Moldova va Portugaliya ligalarida harakat qilgan. 2008 yil katta futbolda faoliyatini boshlagan 26 yoshlar futbolchi bu vaqt oralig'ida 2008-2009 yillarda "Tigxina" (Moldova), 2010-2011 "Iskra-Stal" (Moldova), 2010-2012 "Tiraspol" (Moldova), 2012-2013 "Dacia" (Moldova), 2013 "Slavia" (Portugaliya), 2013-2014 "Kostuneli" (Moldova), 2014 "Veris" (Moldova) klublarida harakat qilgan.

O'tgan oyda Moldova ligasidan "Veris"ni chetlashtirilishi oqibatida peshqadam jamoa tarqab ketdi. Ushbu futbolchi 5 yanvar kuni Toshkentga etib keladi.