"Mashal" mavsumiy chipta narxlarini belgiladi

Yana ikki haftadan so'ng  24-O'zbekiston milliy chempionati bahslari start oladi. Bu mavsum klublar soni 16 taga etgan va har bir jamoa o'z maydonida 15 tadan uchrashuvni qabul qiladi. Muborakdagi bahslarda jamoamizni stadionda qo'llab-quvvatlash uchun muxlislar fan-klubi tashkil etilgan. Undan tashqari klubga befarq bo'lmagan muxlislar uchun yillik mavsumiy chiptalar ham sotuvga qo'yildi. Bu yilda yillik mavsumiy chiptalar 75 ming so'mdan etib belgilangan bo'lsa,  uchrashuvga kirishni istagan muxlislar har bir o'yinga alohida chiptalarni ham sotib olishi mumkin. Har bir o'yinga chiqarilgan chipta  5 ming so'mdan bo'lib, 18 yoshga to'lmagan barcha muxlislar uchun 1000 so'mdan bo'ladi.

Har bir o'yinda muxlislar uchun bahs oldidan koncert dasturlari, o'yinlarning tanaffus qismida muxlislar uchun "Omadli muxlis" loyixasi tashkil etiladi. Bilet egalari ushbu loyixa ishtirokchilasiga aylanib boradi va qimmatbaho sovg'alarga ega bo'ladi. Stadionimiz mehmonlari esa O'zbekiston chempionatining eng shiddatli bahslari bilan birga, "Nasaf" va "SHo'rtan"ga qarshi voha derbisi, O'zbekiston chempioni "Paxtakor"ga qarshi o'yin, kubok sohibi "Lokomotiv" va  bir necha sobiq futbolchilarimiz bilan tarkibini to'ldirgan "Bunyodkor"ga qarshi o'yinlarni ham bevosita stadionda guvohi bo'lasiz. Futbol muxlislar uchun va "Mashal" muxlislar uchun o'ynaydi. Sizning qo'llab-quvvatlashingiz esa jamoaga eng muhimidir.

Eslatib o'tamiz, "Mashal" birinchi turni safarda "Navbahor"ga qarshi o'tkazadi. Ikkinchi tur bahsi 20 mart kuni Muborakda "Andijon"ga qarshi bo'lib o'tadi.