E'tiborlisi “gazchilar”ning g'alabasiz seriyasi 8ta o'yindan so'ng barham topdi. Boisi Aleksandr Xomyakov boshqaruvidagi jamoa so'nggi bor, chempionatning 13-turida o'z uyida “Xorazm”ni qabul qilib, 2:0 hisobida g'alaba qozongandi. Shundan so'ng muborakliklarni sira tanib bo'lmadi deyish mumkin. Negaki, “Mashal” ortda qolgan 8ta o'yinning 4tasida durang qayd etib (“Istiqlol” – “Mashal” 1:1, “Mashal” – “Dinamo” 0:0, “Mashal” – “Andijon” 2:2, “Mashal” – “Norin” 0:0), qolgan 4ta uchrashuvda raqiblariga imkoniyatni boy berib (“Norin” – “Mashal” 2:1, “Andijon” – “Mashal” 2:1, “Dinamo” – “Mashal” 2:0, “Mashal” – “Istiqlol” 1:2), qimmatli ochkolarni qo'ldan chiqarib kelayotgandi.
4 sentyabr, seshanba kuni “Mashal” jamoasi nihoyat ushbu yoqimsiz seriyasiga nuqta qo'ydi. Ahamiyatlisi 8ta tur o'tib, “gazchilar” yana “Xorazm”ni mag'lub etdi. Faqat bu safar o'yin Urganchda kechdi. E'tiborlisi muborakliklar uchrashuvning 90+5-daqiqasida raqib darvozasiga ikkinchi to'pni kiritib, g'alabani ilib ketdi.
