Mart oyida "Dinamo" murabbiylar shtabi tengsiz

O'tgan oyda Samarqandning "Dinamo" klubiga O'zbekistonning "Lesteri" degan laqab qo'yildi. Bunga etarli sabablar bor albatta. O'tgan mavsumda birinchi ligada ishtirok etib qaytgan "Dinamo" elitaga qaytishini Bekoboddagi ajoyib g'alaba bilan boshladi - 2:0. So'ngra "SHo'rtan" 3:0 hisobida tor-mor etildi. Toshkentda "Paxtakor" mehmoni bo'lgan "arslonlar" 1:0 hisobida g'alaba qozonib chempionatni ketma-ket 3ta g'alaba bilan boshladi! Bundan tashqari jamoa mana shu o'yinlarda umuman gol o'tkazgani yo'q. Oyning so'nggi kunida "Dinamo" "Navbahor"ga yutqazib qo'yganini ham qo'shimcha qilib qo'yish kerak. Lekin dunyoda mag'lub bo'lmaydigan jamoa umuman yo'q.

SHu sababli ko'pchilik "Dinamo"ning sensacion "yurishini" o'tgan mavsum Klaudio Raneri boshchiligida Angliya premer-ligasida g'olib bo'lgan "Lester"ga ham qiyoslashdi. Jamoa safida deyarli yulduz futbolchilar yo'qligi, yosh va g'ayratli o'yinchilarning maydonda borlarini berib o'ynashlari tufayli mazkur natijalar qayd etildi.

Championat.asia sayti talqiniga ko'ra mart oyining eng yaxshi murabbiyi deb "Dinamo" klubi murabbiylar shtabi tan olindi. Jamoa bosh murabbiyi Oleg Tyulkin chempionat boshlanishiga oz fursat qolganida jamoani qabul qilib oldi va shogirdlarini g'alabalar sari boshlay oldi. Jamoaning g'alabalarida Ilhom SHaripovning ham kattagina xissasi borligi barchaga oydek ravshan. Bundan tashqari murabbiy Uchqun Qobilov ham bu shtabda anchayin samarali mehnat qilmoqda.  

Mavsumni yaxshi boshlagan "Dinamo" keyingi oylarda ham bu g'alabali yurishini davom ettira olarmikin. Birgalikda kuzatishda davom etamiz.

Mart oyida shuningdek "Lokomotiv" murabbiylar shtabi, "Nasaf" ustozi Ro'ziqul Berdiev hamda "Mashal" bosh murabbiyi Aleksandr Xomyakov ham o'z jamoalari bilan ijobiy natijalar qayd eta olishganini qayd etish lozim.