"Margaret Tetcher, eshityapsanmi, saylov kampaniyang qizigan paytda menda senga bir xabar bor..."

Norvegiya terma jamoasi oxirgi mart 1998 yilgi mundialda ishtirok etgan. Jamoa 1938, 1994 yillarda ham Jahon chempionatida qatnashgan. Ammo hozir 1982 yilgi JCH saralashi doirasidagi o'yinni yodga olamiz.

1981 yilning 9 sentyabr kuni Oslodagi "Ullevol" stadionida Norvegiya va Angliya o'rtasida Ispaniya mezbonligidagi Jahon chempionati  saralashi doirasidagi o'yin bo'lib o'tgan.

O'sha o'yinda mezbonlar Angliyani 2:1 hisobida sensacion tarzda mag'lub etgan va norvegiyalik sharhlovchi Byorge Lillelien jonli efir vaqtida o'zining hissiyotlarini ushlab tura olmay, ajoyib monologni dunyoga keltiradi. Aynan o'sha monolog Lillelienni jahonga mashhur qiladi va dunyoning turli burchaklarida hamon uning o'sha sharhiga parodiyalar aytib turiladi.

Dastlab 15-daqiqada inglizlar Brayan Robsonning goli evaziga hisobni ochishgan. 35-daqiqada Tom Lund hisobni tenglashtirdi. 41-daqiqada Xallvar Toresen gol urib, Norvegiyani oldinga olib chiqqan - 2:1. O'yin tugashi bilan sharhlovchi xursandligidan mana shu monologni "yaratgan" (agar ingliz tilini tushunsangiz videoni ko'rganingiz maqul):

"Biz dunyoda eng zo'rmiz! Biz dunyoda eng zo'rmiz! Biz Angliyani futbolda 2–1 hisobida engdik!! Bu mutlaqo hayratlanarli! Biz Angliyani engdik!

Angliya – qahramonlar tug'ilgan yurt.

Lord Nelson, Lord Biverbruk, Ser Uinston Cherchill, Ser Entoni Iden, Klement Ettli, Genri Kuper, Ledi Diana – biz ularning hammasini engdik.

Biz ularning hammasini engdik!

Margaret Tetcher, eshityapsanmi?

Margaret Tetcher, saylov kampaniyang qizigan paytda menda senga bir xabar bor.

Menda senga xabar bor: Biz Angliyani jahon chempionatida futboldan chiqarib yubordik.

Margaret Tetcher, sening tilingda, Nyu-Yorkdagi Medison Skver Garden atrofidagi boks barlarida aytilganidek:

"Sening yigitlaring qattiq mag'lubiyatga uchradi! Sening yigitlaring qattiq mag'lubiyatga uchradi!"

Ammo sharhlovchining shuncha xursandchiligi uzoqqa cho'zilmaydi Norvegiya oxirgi turda safarda Vengriyaga yutqazib saralash guruhida oxirgi o'rinni egallaydi. Angliya esa o'z maydonida Vengriyani mag'lub etib Jahon chempionatiga chiqqan edi. Ammo 1987 yilda 60 yoshida vafot etgan Byorge Lillelienning ushbu o'yindagi sharhi tarixdan abadiy joy oldi.