Lyubinko Drulovich: "Hindiston bunchalik yaxshi o'ynashini kutmagandim"

"O'ylashimcha shogirdlarim bugungi o'yinni yaxshi o'tkazishdi. Sababi birinchi o'yinda birdaniga yaxshi o'ynash og'ir bo'ladi. O'z maydonimizdagi musobaqada biroz bo'lsa ham bosim bo'ladi. SHunchalik qiyinchilik bo'lsa ham munosib o'ynadik. Bundan tashqari Hindiston bu darajada yaxshi o'ynashini kutmagandim. Bizga juda yaxshi qarshilik ko'rsatishdi. SHogirdlarimni g'alaba bilan tabriklayman", - deydi Lyubinko Drulovich. 

- Bobir Abdixoliqov zaxiradan maydonga tushib ikkita gol urdi. Nega u asosiy tarkibda emasdi?
- Bobir juda yaxshi futbolchi. Biroq u oxirgi 7 kun mashg'ulot o'tkazmagan edi. SHu bois uni faqatgina zaxiradan maydonga tushirdik".

- Yig'inlar vaqtida Abdulla Abdullaev va Jasur Yaxshiboev asosiy tarkibda o'ynashdi. Bugun raqib Hindiston bo'lgani uchun ularni zaxirada qoldiringizmi?
- Yaxshiboev bizning yig'inimizga 5 kun oldin qo'shildi. Uni juda yaxshi futbolchi deb hisoblayman, biroq faqatgina AGMK bilan bahsdagina sinab ko'rdim xolos.

- Oston O'runov va Islom Kenjaboev raqibni aldash jarayonida juda ko'p xato qilishdi. Oybek Rustamov esa juda ko'p brak paslar berdi. SHu o'yinchilar haqida qanday fikrdasiz?
- Oston juda yosh futbolchi. Yosh bo'lishiga qaramay to'pni sevadigan bola. U bilan ko'p gaplashganmiz, iloji boricha oddiy o'ynagin deb aytaman. Lekin baribir juda yaxshi futbolchi. Rustamov esa taktik jihatdan juda yaxshi o'yinchi, o'z chiziqlarini yopib to'g'ri o'yin ko'rsatadigan futbolchi. Xatolarga keladigan bo'lsak, bu futbol, futbolda bo'lib turadi.

- Xojiakbar Alijonov 5 kun oldin yig'inga qo'shildi. Ko'pchilik Alijonovning "Paxtakor"dagi o'yinlarini ko'rib uni asosiy tarkibda kutishgandi...
- Uning ham vaziyati Yaxshiboevga o'xshaydi. Ispaniya va Turkiyadagi yig'inlarda himoyaviy o'yinlarga etibor qaratdik. Himoyadagi futbolchilarning bir-birini tushunishi shakllanib ulgurgan.

- Keyingi raqib Tojikiston. Ularning ustozi Usmon Toshev. U o'zbekistonlik va jamoamiz haqida barcha malumotni biladi. Ularga qarshi o'zgacha taktika yoki syurprizlar bo'ladimi?
- Asosiy maqsadimiz futbolchilarni tiklab olish. Hindiston va Tojikiston o'rtasidagi o'yinni ko'ramiz. Usmon Toshev bizning jamoani bilishi oddiy xol. Bizning asosiy maqsadimiz tiklanishdan iborat.

- Abdixoliqov "Nasaf"da markaziy hujumda o'ynaydi, ammo terma jamoalarda vinger sifatida o'ynadi. Bugun ham uni vinger sifatida maydonga tushirdingiz va markaziy hujumga o'tkazganingizdan keyin ikkita gol urdi. 

- Albatta buni bilaman. Bu juda yaxshi holat, chunki Bobirni ham vinger, ham markaziy hujumchi sifatida o'ynatishim mumkin. Mirjahon maydonda bo'lganida uni vinger sifatida o'ynatdim.