Luis Enrike "Liverpul"ga imkoniyatni boy berganidan keyin: "Shu o'yinni takrorlasak, keyingi bosqichga chiqamiz"

Luis Enrike PSJning 1/4 finalga chiqish imkoniyatlariga baho berdi.

"Biz ko'prog'iga loyiq edik. Bugungi bellashuv kichik detallar yoki statistik ko'rsatkichlarga bog'liq emasdi. Biz "Liverpul"ga o'yin bermadik va deyarli barcha jabhada ustunlik qildik. Raqib dastlabki besh daqiqa bizdan yaxshiroq ko'rindi, qolgan daqiqalarda biz ustunlik qildik.

Shubhasiz, PSJ keyingi bosqichga chiqa oladi. Biz endi birinchi o'yinni o'tkazdik. Yo'qotadigan narsamiz yo'q. Bugungi o'yinni takrorlay olsak, keyingi bosqichga chiqamiz.

Albatta, bizga oson emas, lekin biz Angliyaga yo'l olamiz va bugungidek o'yin ko'rsatishga harakat qilamiz. Avval ham shu kabi vaziyatda safarda kambek qila olganmiz. Javob bahsida ham ishonchli o'yin ko'rsatib, keyingi bosqichga chiqishga loyiq jamoaligimizni isbotlaymiz", – dedi PSJ ustozi.