“Lokomotiv” tarbiyalanuvchilari xotira turnirida uchinchi bo'lishdi

“Joma” sport kiyimlari kompaniyasi homiylik qilgan ushbu turnirda 2004-2005 yilda tug'ilgan futbolchilar ishtirok etishdi.

Mazkur musobaqada qatnashgan “Lokomotiv” futbol maktabining 2004/2005 yillarda tug'ilgan tarbiyalanuvchilari yakunda uchinchi o'rin sohibi bo'lishdi. Erkin Saidov boshqarayotgan futbol maktabimiz tarbiyalanuvchilari turnir davomida o'zlaridan iliq taassurot qoldirishdi.

Sunnat Ro'ziev va Dilshod Atamuhamedov boshqaruvidagi yosh “temiryo'lchilar” “A” guruhida bahslarga kirishishdi va guruhdagi har uchala o'yinda g'alaba qozonib yarim finalga yo'l olishdi.

1-tur. “Lokomotiv” – “Dilkusho” 4:2
2-tur. “Lokomotiv” – “Buxoro” SK 3:2
3-tur. “Lokomotiv” – “Buxoro” PFK 2:1

Jami sakkizta jamoa ishtirok etgan xotira turniri yarim final uchrashuvini “V” guruhi peshqadami “Olimpik”ka qarshi o'tkazgan “Lokomotiv” bu o'yinda raqibiga 2:3 hisobida yutqazib qo'ydi. Natijada uchinchi o'rin uchun kechgan bellashuvda maydonga tushgan futbolchilarimiz SDYUSSHOR-6 ustidan 3:2 hisobida g'alaba qozonishdi.

Musobaqa yakunida odatdagidek g'olib va sovrindorlarni taqdirlash marosimi bo'lib o'tdi. Bunda chiziqlar bo'yicha eng yaxshilar ham aniqlandi. “Lokomotiv” darvozaboni Murodov Dilshod “Eng yaxshi darvozabon” deb topilgan bo'lsa, Nig'monov Amirhayit 10ta gol bilan musobaqaning “Eng yaxshi to'purari” bo'ldi.