"Lokomotiv": O'tgan hafta yakunlari (11-17 may)

OLIY LIGA

Asosiy tarkib jamoamiz oliy liganing 9-tur uchrashuvini o'tkazdi. Safarda "Olmaliq" bilan kechgan bahsda Vadim Abramov shogirdlari 2:2 hisobida durang o'ynashdi. Agar o'yin tugashiga 4 daqiqa qolganida Lutfulla To'raev gol urmaganida mag'lubiyatga uchrashimiz ham mumkin edi.

Uchrashuv sariq kartochkalarga boy tarzda kechdi. Bosh hakam Viktor Serazetdinov jami 11ta sariq kartochka ko'rsatdi. SHundan 7tasi maydon egalariga, to'rttasi "Loko" futbolchilariga. "Olmaliq" darvozasiga kiritilgan to'plarga Sanjar SHoahmedov va Lutfulla To'raev mualliflik qildi.

Ayni paytda "Lokomotiv" 18 ochko bilan turnir jadvalida 5-o'rinda bormoqda. Jamoamiz keyingi turni o'z maydonida "Qo'qon-1912"ga qarshi o'tkazadi.

YOSHLAR LIGASI

O'rinbosarlar tarkibimiz 13 may kuni "Olmaliq" yoshlariga qarshi bahs olib borishdi. Bu o'yinda yosh "temiryo'lchilar" 0:3 hisobida mag'lub bo'lishdi. Aytish mumkinki, o'rinbosarlarimiz o'zlaridan kutilgan futbolni namoyish qila olishmadi. "Olmaliq" esa o'z imkoniyatlaridan foydalanib yirik hisobdagi g'alabani tantana qildi. "Lokomotiv" o'rinbosarlari turnir jadvalida 11 ochko bilan 10-o'rinda boryapti.

IKKINCHI LIGA (1997)

Ikkinchi ligada ishtirok etayotgan "Lokomotiv-1997" 11 va 14 may kunlari ikkita uchrashuvda maydonga tushdi. Marsel Idiatulin shogirdlari avvaliga "CHilonzor" bilan 2:2 hisobida durang o'ynagan bo'lishsa, keyingi turda "Beruniy"ni 2:0 hisobida mag'lub etishdi. Eslatib o'tamiz, "Loko-98" "V" guruhida ishtirok etmoqda.

IKKINCHI LIGA (1998)

Ikkinchi liganing "D" guruhi o'yinlarida qatnashayotgan "Lokomotiv-1998" esa 12 may kuni safarda "Olimpik"ka qarshi bahs olib borib, 0:1 hisobida mag'lub bo'ldi. Yuriy Vintovkin jamoasi 15 may kuni SDYUSHORga qarshi maydonga tushib, 2:0 hisobida zafar quchdi. Jamoa keyingi tur uchrashuvini ertaga "Liverpul"ga qarshi o'tkazadi.

BOLALAR CHEMPIONATI

"Lokomotiv" futbol maktabining 1999, 2000, 2001, 2002, 2003, 2004, 2005 yillarda tug'ilgan futbolchilari kecha, 17 may kuni Toshkent shahar bolalar chempionatida 6-tur bahslarini o'tkazishi lozim edi. Bu turda tarbiyalanuvchilarimiz BO'SM-37ga qarshi to'p tepishlari kerak edi. Biroq maydon holati qoniqarli bo'lmagani uchun o'yinlar boshqa kunga qoldirildi.

AYOLLAR FUTBOLI

Vohid Xolboev boshqarayotgan "Lokomotiv-W" 16 may kuni O'zbekiston chempionatining 2-tur bahsini o'tkazdi. "Do'stlik" stadionida bo'lib o'tgan uchrashuvda qizlarimiz "Sevinch"ni qabul qilishdi va 0:4 hisobida mag'lub bo'lishdi. Endi "Lokomotiv-W" o'zining navbatdagi uchrashuvini ertaga, 19 may kuni yana o'z maydonida o'tkazadi. Bu safar Muborakning "Mashal-W" jamoasiga qarshi maydonga tushamiz.