"Lokomotiv" bugundan mashg'ulotlarni davom ettiradi

"Temiryo'lchilar" dastlab 19 iyun kuni G'uzorda "SHo'rtan" mehmoni bo'lishadi. Jamoa o'yinni o'tkazib Toshkenga qaytib kelgach, oradan ko'p o'tmay Namanganga otlanadi. CHunki 23 iyun kuni O'zbekiston Kubogining 1/8 final bosqichidan o'rin olgan "Navbahor"ga qarshi javob bahsini o'tkazamiz. Undan keyin Muborak sari yo'lga chiqamiz va 26 iyun kuni "Mashal"ga qarshi oliy liga uchrashuvida kuch sinashamiz. "Lokomotiv" birinchi davraning oxirgi turini o'z maydonida 1 iyulda o'tkazadi. SHu kuni "Navbahor" bilan o'ynaymiz.

"Qizilqum" bilan kechgan bahsdan so'ng bosh murabbiy Vadim Abramov futbolchilarga uch kunlik dam bergandi. Bugun jamoamiz vakillari yana klub qarorgohida to'planib, navbatdagi uchrashuvlarga tayyorgarlikni boshlashadi. Xabaringiz bor, hozirda olti nafar futbolchimiz milliy terma jamoa mashg'ulotlarida ishtirok etmoqda. Bular - Ignatiy Nesterov, Islom To'xtaxo'jaev, SHavkat Mullajonov, Ikrom Aliboev, Jasur Hasanov va Lutfulla To'raev. Bundan tashqari, legioner hujumchimiz Ruslan Koryan Armaniston safida maydonga tushish uchun terma jamoa ixtiyoriga jo'nab ketgan. SHu bois bu futbolchilar hozircha "Loko" mashg'ulotlarida ishtirok eta olishmaydi.

"Lokomotiv"ni oldinda kutayotgan bahslar: 
19 iyun. "SHo'rtan" - "Lokomotiv" (Oliy liga)
23 iyun. "Navbahor" - "Lokomotiv" (Kubok)
26 iyun. "Mashal" - "Lokomotiv" (Oliy liga)
1 iyul. "Lokomotiv" - "Navbahor" (Oliy liga)