“Lokomotiv-BFK” musobaqa g'olibi

Mazkur musobaqada 9 ta jamoa ishtirok etdi.  Uchrashuvlar avvaliga ikki guruhda olib borildi. O'z guruhlarida dastlabki ikki o'rinni egallagan jamoalar yarim final juftliklarini hosil qilishdi.

Nihoyat, uchinchi o'rin uchun bo'lib o'tgan o'yinda “Navro'z” jamoasi yosh futbolchilari “Paxtakor”chi tenqurlarini yirik, 3:0 hisobida mag'lubiyatga uchratishdi. Hal qiluvchi uchrashuv ham shunday hisobda yakunlandi. Ushbu bellashuvda Anvar Alimov va Alisher Ro'zmetovlar ustozlik qilayotgan  “Lokomotiv-BFK” futbolchilari “Do'stlik” jamoasi ustidan ishonchli g'alabaga erishib, birinchilik g'olibi bo'ldi.

- Mubolag'a emas, o'tgan yillar mobaynida sport maktabimizdan qator taniqli futbolchilar etishib chiqqan, - deydi 2-son VBO'SM direktori Jamoliddin Abdullaev. – Ayni damda, ularning bazilari mamlakatimizning etakchi jamoalari safida to'p surayotir. Nihoyasiga etgan musobaqamizda ularning ko'plab izdoshlarini kashf etdik. Ishonchimiz komilki, bugungi birinchiligimiz mazkur yoshlarimiz uchun mahorat maktabi vazifasini o'tadi.

Tadbirning yopilish marosimida qatnashgan Xorazm viloyati futbol federaciyasi birinchi vice prezidenti Ravshan Atajonov, “Xorazm” jamoasi bosh murabbiyi Vali Sultonov, sport faxriysi Ozod Abdullaev va boshqalar musobaqaning ahamiyati haqida to'xtalishib, g'olib va sovrindorlarni erishgan yutuqlari bilan qutlashdi. O'z navbatida shohsupaga ko'tarilgan jamoalar kubok, tegishli darajadagi diplom va sovg'alar bilan taqdirlanishdi.

Ikrom  XUDOYBERGANOV.