"Qizillar"da haqiqatan juda yaxshi futbol maktabi bor: unda Jerrard, Karrager, Ouen, Faouler va boshqa ko'plab yaxshi futbolchilar tarbiya topgan. Hozirda "Liverpul" akademiyasining kamida 15 nafar tarbiyalanuvchisi Premer-liga va Chempionshipda o'ynamoqda.

Lekin, albatta, tarbiyalanuvchilarning hammasi ham muvaffaqiyatli kareraga ega emas, ko'plari futboldagi muvaffaqiyatni kutib o'tirmasdan, omadini boshqa sohada sinashga qaror qilgan.

Misol uchun, Jordan Rossiter "yangi Jerrard" hisoblanardi, ammo uning kattalar futboliga bo'lgan yo'lida jarohatlar to'sqinlik qildi. 1 iyul kuni Jordanning "Reynjers" bilan shartnomasi tugab, erkin agentga aylandi. Rossiter joriy mavsumni ijara asosida Angliyaning uchinchi divizioni vakili "Flitvud"da o'tkazdi. 23 yoshli yarim himoyachi qishda o'zining xochsimon paylarini uzib oldi va uzoq vaqtga safdan chiqdi. Endi u avgust oyida maydonga qaytib, "Flitvud"ni shartnomaga loyiq ekanligiga ishontirishdan umidvor.

Bazilar "Oksford"da o'ynayotgan Kemeron Brennagan kabi quyi bosqichga o'tishadi, kimdir boshqa chempionatga yo'l oladi (Rayan Kent), bazilar oxirigacha sabr qiladi. Ko'pchilik futboldan darhol voz kechadi, chunki real holat kutilmalarga to'g'ri kelmaydi.

Rossiter "The Athletic" nashriga bergan intervyusida "Liverpul" klubi akademiyasi u bilan hanuz aloqada bo'lib turishi va shaxsiy hayotida ham yordam berishini aytdi. Hozir Jordan klubsiz qolgan paytida, uning jonajon jamoasi unga murabbiylik kursida o'qish yoki universitetga kirishni taklif qildi – "Liverpul" hammasida ko'maklashadi.

Qo'llab-quvvatlash dasturi qanday ishlaydi: AQSHdagi vaziyat

"Liverpul" nafaqat Rossiter, balki hech narsaga ega bo'lmagan boshqa tarbiyalanuvchilarga ham yordam qo'lini cho'zmoqda. Yarim yil muqaddam klub maxsus loyihani ishga tushirdi – endi ular barcha akademiya sobiq o'yinchilarining faoliyatini kuzatib boradi.

Fil Rosko hammasi uchun javobgar: u yosh futbolchilarni futboldan tashqari rivojlantirish bo'limiga rahbarlik qiladi – o'g'il bolalarning yaxshi o'qishi, ota-onalari bilan muloqotda bo'lishini taminlaydi.

"Ertami-kech har bir futbolchi akademiyani tark etadi. U "Liverpul" qarorgohiga boradimi yoki boshqa joygami, farqi yo'q. Biz birgalikda ko'p narsalarni boshdan kechirdik. Agar biz bolaga butun rivojlanish yo'lida hamroh bo'lgan bo'lsak, nega yordam qo'lini cho'zishni keyinchalik ham davom ettirmasligimiz kerak?", – deydi Rosko.

Klub akademiya tarbiyalanuvchilari malumotlar bazasini yaratdi: unga nafaqat oxirgi qabul qilingan yigitlar, balki 10-15-20 yil oldin "Liverpul"ni tark etganlar ham kiradi. Barcha bitiruvchilarga dastur haqida batafsil malumot yuborildi va ular bilan qanday bog'lanish masalasi kelishib olindi – ular istalgan vaqtda yordamdan foydalanishlari mumkin.

Hozirda "Liverpul"ni tark etayotganlar uchun mutaxassislar maxsus "chiqish strategiyasi"ni tayyorlagan: professional futbolchilik faoliyatida omadi yurishmaganlar uchun boshqa variantlar taklif qilinadi – murabbiylikka o'qish yoki universitetda tahsil olish. Futbolchilarga rivojlanishning boshqa yo'llari haqida tushuncha beriladi.

Rosko klub saytiga 2020 yil may oyida intervyu bergan. Filning so'zlariga ko'ra, o'sha paytda kamida ikki tarbiyalanuvchi ushbu dasturdan foyda ko'rgan, ulardan biri besh yil oldin akademiyani tark etgan, ammo hozirda murabbiylik faoliyatini boshlash niyatida – UEFA B licenziyasini olish arafasida. Ikkinchisi "Liverpul"dan Liga 1 jamoasiga o'tgan, lekin bu ish bermagan. Endilikda jonajon klubi unga Angliyadagi universitetlardan birida o'qishni tavsiya qilmoqda.

Tarbiyalanuvchilar bilan ishlash usuli Amerika universitetlari va kollejlarinikiga o'xshash: ular bitiruvchilarning muvaffaqiyatini kuzatib boradilar, chunki tushunishadiki, tarbiyalanuvchilar talim muassasasining yuzi. Abiturientlar qaerda o'qishni tanlashida bitiruvchilarning faoliyati muhim qo'llanma bo'ladi. Xuddi shunday futbol akademiyasi qiyofasi nafaqat yuqori darajadagi yoshlar, balki boshqa futbolchilarning keyingi taqdiri qanday kechganidan kelib chiqib namoyon bo'ladi. Ulardan biri omadsiz futbolchilik faoliyatidan so'ng depressiya o'rniga klub tizimida muhim murabbiyga aylansa, u butun klub manfaati va uning jozibadorligi uchun mehnat qiladi.

Tarbiyalanuvchilar bilan tizimli ishlash g'oyasi akademiya direktori Aleks Ingltorpga tegishli. U "The Athletic" nashriga bergan katta intervyusida bu tashabbus haqida gapirib, "Liverpul" futbol maktabi ishiga to'xtalib o'tdi.

"Biz bu loyihani boshlaganimizdan juda xursandman. Agar "Liverpul"da butun yoshligingizni futbol o'ynashni o'rganishga sarflasangiz, universitetga kirish ancha qiyinroq. 18 yoshda ko'pchilik talimning qadrini tushunmaydi. Ammo ularning omadlari kelmasa va 24 yoshga to'lmasdan futbol olamidan chetlashishsa, bu qanchalik muhimligini tushunishadi. Menimcha, aynan shu erda biz odamlarga yordam berishimiz va yo'l-yo'riq ko'rsatishimiz kerak.
Bazilar murabbiylik licenziyasini oladi, ammo ularning soni kam. Kimdir universitetga kiradi, kimdir biznes bilan shug'ullanadi yoki shunchaki futbolda qaysidir lavozimda ishlaydi. Biz uchun bu futbolchilar bilan aloqada bo'lish muhim, garchi ularda hozir hammasi joyida bo'lsa ham. Ular yordamga muhtoj bo'lganida, biz ularning yonida bo'lishimiz lozim. Biz bu yigitlar uchun javobgarmiz. Siz shunchaki You'll Never Walk Alone deb kuylay olmaysiz".

"Liverpul" akademiyasi: Sen yolg'iz emassan