Leo Igita: "Bu men uchun so'nggi JCH edi"

- O'yin haqida

- Qiyin bahs bo'ldi. Birinchi taymda nazorat bizda edi, hammasi yaxshi ketayotgandi. Ikkinchi taymda xatolar qila boshladik. Argentinalik futzalchilar xatolarga javob berish bo'yicha mutaxassis bo'lib ketishgan. Ular xatolarni kechirmaydi va bir necha yillardan buyon buni isbotlab kelmoqda. Albatta, mag'lubiyatga uchrash alamli. Biroq jamoadoshlarim bilan faxrlanaman, ular faqat g'alaba uchun maydonga chiqishdi. Boshimizni tik tutgan holda uyga qaytishimiz kerak, chunki munosib o'ynadik. O'zbekiston xalqiga qo'llab-quvvatlash uchun minnatdorlik bildirmoqchiman. Barcha muxlislar, yaqinlarimizga rahmat. Tashkilotchilik va musobaqa uchun masullarga tashakkur!

- Qozog'iston o'z oldiga qanday maqsadni qo'ygandi va qanchalik bunga erisha oldi?

- Dastlabki maqsadimiz guruhda birinchi o'rinni egallash edi, ammo bu unchalik o'xshamadi. Ispaniyaga qarshi yaxshi o'ynab, durangga erishdik. Liviyani yirik hisobda mag'lub etdik. Yangi Zelandiyani ham engdik. Ikkinchi o'rin bilan pley-offga chiqib, Portugaliya bilan ro'baro' keldik. Jahon chempionini chiroyli o'yin evaziga yutdik. Umuman olganda, barcha vazifalarni muvaffaqiyatli bajardik. Bugun ham hammasi reja bo'yicha ketayotgandi, biroq ikkinchi taymda barchasi nazoratdan chiqib ketdi. Vaziyatlar bo'ldi, ammo unumli foydalana olmadik. 1:6 hisobi qayd etilganiga qaramay, boshimizni tik tutgan holda yurishga loyiqmiz deb o'ylayman.

- Terma jamoadagi faoliyatingizni yakunladingizmi?

- Terma jamoadagi faoliyatim yakunlanmadi. Ammo bu men uchun so'nggi JCH edi. Uchta mundialda qatnashdim. Keyingi JCHda 43 yoshda bo'laman, bu qiyin bo'ladi.