Kutib oling, ikkinchi tur kelyapti...

20 mart, juma

"Buxoro" (Buxoro) - "Dinamo" (Samarqand)

Hakamlar: A. Asimov (Toshkent), T. Galeev (Toshkent), A. Po'latov (Toshkent), N. Boltaev (Navoiy)

Nazoratchi: A. Arutyunov (Toshkent).

Imkoniyatlar: 55/45

Bu ikki shaharning jahon tarixida tutgan o'rni katta. Buyuk shaharlar to'qnashuvidagi ikki jamoa ham birinchi turda mag'lubiyatga uchradilar. "Dinamo" o'z maydonida, "Buxoro" esa safarda. Birinchi tur o'yinlaridan kelib chiqsak, o'yindagi ustunlik "Buxoro"da bo'lishini bashorat qilish qiyin emas. Aslini olganda, ikkala jamoaning ham o'yinida o'xshashlik mavjud. Biroq maydon egaligini inobatga olsak, Mochinovda g'alaba qozonish uchun yaxshi imkoniyat bor. 

"Navbahor" (Namangan) - "Metallurg" (Bekobod)

Hakamlar: T. To'xtasinov (Andijon), A. Marajabov (Andijon), Z. Abdurahmonov (Andijon), R. Tolibjonov (Farg'ona)

Nazoratchi: I. Mustafin (Toshkent).

Imkoniyatlar: 50/50

Bu o'yinda "Navbahor" o'zining bosh murabbiyi bilan ishtirok etadi. Vetnamdan qaytib kelgan Baxtiyor Ashurmatov "Navbahor"ni ikkinchi turga tayyorladi va buning mevasini ertaga ko'rishimiz mumkin. Lekin raqib oddiy jamoa emas, "Lokomotiv"ni ikki ochkodan mahrum qilgan "Metallurg". Qizig'i shundaki, birinchi turda ikki jamoa bosh murabbiylari turli sabablarga ko'ra qatnasha olmagan edilar. "Metallurg" himoyada o'ynashni biladigan jamoa hisoblanadi. "Navbahor"ning kuchini esa ertaga ko'ramiz. SHunday ekan, bu ikki klubning g'alabaga bo'lgan imkoniyati teng.

"Mashal" (Muborak) - "Andijon" (Andijon)

Hakamlar: R. Ermatov (Toshkent), A. Rasulov (Toshkent), J. Saidov (Toshkent), A. Rubakov (Toshkent)

Nazoratchi: A. Hotamov (Toshkent).

Imkoniyatlar: 60/40

Afsuski, "Andijon"da muammolar hamon mavjud. Jamoa Muborakdagi o'yinga, qarz ko'tarib yo'l olgani haqida mahalliy muxlislar xabar qildi. Demak, jamoadagi ahvol tang. Bu esa ikki kundan beri o'yinga jiddiy tayyorgarlik ko'rayotgan, kuni kecha Toshkentdan bir nechta muxbirni Muborakka taklif qilgan "Mashal" uchun ayni muddao. Tarkib jihatdan ham "Mashal" raqibiga nisbatan kuchli. Eng muhimi, "Andijon" matbuot kotibi ham Muborakka yo'l olgan.