Kuper o'yindan keyin nimalar degan bo'lishi mumkin?

Xabaringiz bor, kechagi bahsda 0:4 hisobida yutqazib qo'ydik. Bugun esa OFK rasmiy sayti koreyaliklar ustozi Paulu Bentuning o'yindan keyingi fikrlarini chop etdi. Aytish mumkinki, portugaliyalik murabbiy ish boshlaganidan beri Janubiy Koreya uning qo'l ostida 6ta uchrashuv o'tkazib, birortasida mag'lub bo'lmadi.

Murabbiy o'yin haqida shunday dedi: "Biz butun uchrashuvni nazorat qildik. Birinchi taymdan so'ng 2:0 hisobida g'alaba qozonayotgandik, tanaffus paytida yana hujum qilish kerakligini aytdim. Bu esa chiroyli natijaga olib keldi. O'ylaymanki, biz to'g'ri yo'ldamiz. Men barcha futbolchilar terma jamoaning maqsadi qaerga borish ekanini tushunib etishlarini xohlayman. Biz o'z falsafamizdan og'ishmay faqat maqsad sari harakat qilishda davom etamiz".

Xullas, Paulu Bentuning fikri qisqacha bo'lsa ham saytda chiqibdi. Lekin OFK tugul, o'zimizning O'FA saytida ham Ektor Kuperning o'yindan keyin nimalar degani yo'q. Balki murabbiy gapirmagandir, balki matbuot anjumani o'tkazilmagandir. Lekin Kuper terma jamoa bilan Avstraliyaga ketgan tashkilot matbuot xizmatiga ikki og'iz gapirib qo'ysa hech narsa qilmasdi. Balki murabbiy gapirgan-u, ammo matbuot xodimining yozishga vaqti bo'lmagandir. Mayli, biz kutamiz. Har holda terma jamoa bosh murabbiyining o'yindan keyin nimalar degani shaxsan men uchun juda qiziq.

X.Xoliqov