Komilov va O'rinboev gol urgan bahsda "Navbahor" Armaniston klubini mag'lub etdi
17 fev 2020 20:33
Yangiliklar
Komilov va O'rinboev gol urgan bahsda "Navbahor" Armaniston klubini mag'lub etdi
Belek shahridagi “Suena” stadionida bo'lib o'tgan mazkur o'yinda namanganliklar 2:0 hisobida g'alaba qozonishdi.
Mazkur uchrashuvning 17-daqiqasida jamoamizning tajribali himoyachisi G'iyosjon Komilov raqib darvozasidan 30 metrlar chamasi uzoqlikdan belgilangan jarima zarbasini ajoyib tarzda amalga oshirib, hisobni ochdi – 1:0.
Urilgan goldan so'ng, hujumkorlikni yanada kuchaytirgan Andrey Kanchelskis shogirdlari 35-daqiqada hisobdagi farqni yanada oshirishdi. Mahoratli hujumchi Zabihillo O'rinboev “Navbahor”ning navbatdagi hujumini samarali tarzda yakunladi – 2:0.
Natijada “lochinlar” tanaffusga ushbu hisobdagi g'alaba bilan chiqib ketishdi. Ikkinchi bo'limda har ikki jamoa azolarida gol urish uchun bir qator vaziyatlar yuzaga kelgan bo'lsa-da, ulardan samarali tarzda foydalana olishmadi. SHu tariqa namanganliklar ushbu o'yinda yutuqqa erishishdi.
Mazkur bahsda "Navbahor" ustozi Andrey Kanchelskis maydonga quyidagi futbolchilarni tushirdi: Dilshod Hamroev, Tohir SHamsitdinov, Obid Jo'raboev, G'iyosjon Komilov, SHahzodbek Hamidov, Sardor Telyakov, Amirbek Jo'raboev, Abbos G'ulomov, Husayn Ergashboev, Anvar Hojimirzaev, Zabihillo O'rinboev.
Zaxiradan maydonga tushganlar: Islom Abdullaxonov, Mirkomil Lokaev, Abdulhay Ismoilov, Ruslan Bolov.
“Navbahor” qatorasiga uchta durangdan so'ng, nihoyat, navbatdagi nazorat o'yinida zafar quchdi. Eslatib o'tamiz, namanganliklar oldingi o'rtoqlik bahslarida Turkmanistonning “Axal” klubini 1:0, Serbiyaning “Rad” jamoasini 2:1 hisobida mag'lubiyatga uchratib, Qozog'istonning “Jetisu” klubi bilan 1:1, Ukrainaning “Kolos” jamoasi bilan 0:0 va Gruziyaning “Samtredia” klubi bilan 1:1 hisobidagi durangga imzo chekishgandi.
“Navbahor” Turkiyada yana 1ta nazorat-sinov o'yini o'tkazadi. Mazkur o'rtoqlik bahsi 20 fevral kuni bo'lib o'tadi. Ammo “lochinlar”ning raqibi qaysi jamoaligi hozircha nomalum.
“Navbahor” PFK matbuot xizmati
Fikrlar