Kim Sang Sik: "K-1 Liga sharafini himoya qilish uchun borimizni beramiz"

Bugun dastlabki tur bahslari oldidan «Bunyodkor» stadionida «H» guruh jamoalari bosh murabbiylari ishtirokida matbuot anjumani bo'lib o'tdi. Unda "CHonbuk Motors" klubi bosh murabbiyi Kim Sang Sik va futbolchi Xon Jon Xo fikrlarini bildirib o'tdi.

"OCHLda har mavsum ishtirok etish biz uchun katta sharaf hisoblanadi. Birinchi o'yin doim qiyin o'tadi. Biz ertaga eng yaxshi o'yinimizni namoyish qilishga harakat qilamiz. Har bir uchrashuvda faqat g'alaba uchun maydonga chiqamiz",- deydi Kim Sang Sik.

"Men o'zimni yaxshi his qilmoqdaman. Bu erga moslashish yaxshi ketyapti. Bir haftadan beri mashg'ulot o'tkazmoqdamiz. O'ylamanki, ertaga g'alaba qozonishni uddasidan chiqamiz",- deydi Xon Jon Xo.

- Jamoa o'tgan mavsum OCHLda muvaffaqiyatli ishtirok eta olmagandi. Buning sababi nimada edi? Joriy yilgi musobaqada qanday maqsadlar qo'yilgan?

- O'tgan yili Qatarda o'tkazilgan musobaqaga chempionatimizni endi yakunlab borgan edik. SHuningdek terma jamoa yig'inlari sabab tarkibimiz to'liq bo'lmagandi. Bu yil esa vaziyat boshqacha. Toshkentga iloji boricha barcha futbolchilarimizni olib keldik. Hammasini holati yaxshi. OCHLda chempionatimiz sharafini munosib himoya qilish uchun borimizni beramiz.

- Raqib jamoa "CHiangray Yunayted" haqida fikringiz qanday? 

- Raqib ishtirokidagi ko'pgina uchrashuvlarni kuzatdim. Juda yaxshi shakllangan jamoa. Tarkibida mahoratli va  istalgan vaziyatni golga aylantiradigan futbolchilar bor.