"Kelayotgan legioner futbol o'ynasin va oladigan pulini oqlasin" - Asror Aliqulov "Qizilqum"ning transferlari haqida

Tajribali mutaxassis transferlar, tayyorgarlik jarayonlari haqida ham gapirdi. 

"Birinchi yig'inimizni Navoiy shahrida olib bordik. Bunda asosiy etibor mahalliy yoshlarga qaratildi, saralanib olindi. Jamoani shakllantiryapmiz. O'tgan yili to'p tepgan kuchli futbolchilar tark etishgan. Ularning o'rnini asta-sekin to'ldiryapmiz. O'zim ham Pro ligadan Superligaga o'tdim. Maqsad birinchi navbatda murabbiy sifatida o'sish. "Qizilqum" bu yil yaxshi o'yin ko'rsatib muxlislarni xursand qiladi, degan umiddaman. 

Futbolda hech qachon oson bo'lmaydi. Lekin 10ta limit qo'yilgani biroz qiyinchilik tug'diryapti. Har bir futbolchini jamoaga taklif qilishdan oldin yaxshilab o'ylayapmiz",- deydi Asror Aliqulov. 

- Transferlar va futbolchilar bilan kelishishda qaysi jihat qiyinchilik tug'diryapti?

- Birinchi galda moliyaviy tomon. CHunki katta shartnomalar qilolmaymiz. Taklif qilayotgan futbolchilarimiz moliyaviy shartlarimizga ham to'g'ri kelishi kerak. Ikkinchi tomoni futbolchini o'yin uslubi. 

- "SHo'rtan"ga qaraganda "Qizilqum"da ishlash engillik tug'diryaptimi?

- "SHo'rtan"dagi qiyin davrni ko'p eslashni istamayman. Hozir jamoaga kelgan murabbiyga ancha oson. CHunki Pro ligada ancha shakllandi. Yosh bo'lsa ham tajriba to'pladi. "Qizilqum"ga kelganimda ham deyarli tarkib 90 foiz o'zgargandi. Bu erda ishlash osonroq, futbolchilarning darajasi, imkoniyatlari baland. 

- Jamoaga legionerlar kelishi haqida eshitdik. SHunday pallalar bo'ladiki yig'inda o'zini ko'rsatgan xorijlik futbolchilar rasmiy o'yinlarda yo'qolib qolishadi...

- Bu borada adashishga, xato qilishga haqqimiz yo'q. O'zimiz bilgan legionerlarni taklif qilyapmiz. Ayrimlari jamoada o'tgan yili ham o'ynagan, yana 2 nafari tez orada keladi.  Murabbiylar shtabi bu borada adashmadik, deb o'ylayman. Kelgan legioner futbol o'ynasin. Rahbariyat ajratgan mablag'ni oqlashini xohlaymiz. 

- PFL tomonidan transferlarni aniq tartibga solinayotgani, limitlarga qanday munosabatdasiz? 

- Bu to'g'ri. Hozir futbolchilarning talablari oshgani, agentlari bir nechta variantlar taklif qiladi. Limit qaysidir tomonlama yaxshi yani futbolchilarni ko'chib o'tishini nazarda tutyapman. Lekin boshqa tomonlama qiyichilik tug'dirishi turgan gap. 

- Futbolchilar bilan qancha muddatga mo'ljallangan shartnoma imzolanyapti?

- Mahalliy futbolchilar bilan ko'p yillik shartnoma imzolayapmiz. Jamoa yangidan shakllanyapti. Futbolchilar bir xil o'yin ko'rsatmasligi mumkin. Uning o'yini, ishtiyoqidan kelib chiqib mavsum o'rtasida yana uzaytirilishi mumkin.