Kamoliddin Tojiev : "Oxirigacha kurashib, muhim uch ochkoni qo'lga kiritdik"

"Birinchi bo'limda o'yinga kirisha olmadik. Qiyin o'yin bo'lishini ham bilar edik va bunga tayyor edik. Yigitlarga rahmat. Bugun oxirigacha kurashib, muhim uch ochkoni qo'lga kiritdik," - dedi Kamoliddin Tojiev bahs yakunlangach.

- Bugun asosiy tarkibda bir nechta o'zgarishlar bo'ldi. Ushbu rotaciyalar qanchalik o'zini oqladi? O'zingiz ham jamoa birinchi bo'limda qiynalganini aytdingiz...

- Undan oldingi turlarda qiyin o'yinlar o'tkazdik. Shu sababli futbolchilarga dam olish uchun imkoniyat berdik. Birinchi bo'limda biroz o'yinimiz qovushmadi, ammo ikkinchi taymda o'yinimiz yaxshilandi va zaxiradan o'yinga qo'shilganlar o'yinga kirishib keta olishdi.

- Riaskos bugun qaydnomada yo'q edi. Alijonov ham zaxirada qoldi. Demak, ushbu ikki futbolchiga dam berilgan, to'g'rimi?

- Riaskos jarohatda. Alijonovga dam berdik, u barcha o'yinlarda harakat qildi va terma jamoa safida ham o'ynadi.

- "Paxtakor"ning keyingi uchrashuvi "Buxoro"ga qarshi. Ikki jamoa ham Kubok finalida ishtirok etadi. Keyingi uchrashuvda ikki jamoa ham imkon qadar bor "kartalar"ni yashirishga harakat qiladimi?

- "Karta"ni ochmaslikning iloji yo'q. Har bir jamoa bo'lajak raqibining oldingi o'yinlarini ko'radi va kuzatadi. Biz 24-tur bahsiga odatdagidek tayyorgarlik ko'ramiz.

- Birinchi davradagi ikki jamoalar to'qnashuvida "Paxtakor" mag'lub bo'lgan edi va shundan so'ng Pedru Moreyra istefoga chiqarilgan edi. O'sha bahsdan so'ng siz yana jamoaga qaytarildingiz. Hozir esa oradan bir necha oy vaqt o'tdi. Ushbu vaqt ichida "Paxtakor"da qanday o'zgarishlar bo'ldi deb o'ylaysiz? Jamoa o'yinida o'sish kuzatildimi?

- Men jamoada yo'q vaqtim nimalar ro'y berganini bilmayman. Men kelganimdan so'ng biz bir oila bo'lib birlashdik. Oxirigacha kurashyapmiz.