Jasur Hasanov: "Biz uchun ortga yo'l yo'q, har bir uchrashuv finalga teng"

"Surxon" ustidan qozonilgan ishonchli g'alabadan so'ng jamoaning etakchi futbolchisi, saytimiz tomonidan 11-turning ramziy jamoasiga kiritilgan Jasur Hasanovning fikrlari biz uchun qiziq tuyuldi. 

"Yaxshi, ammo og'ir o'yin bo'ldi. "Surxon" ham tajribali futbolchilarga ega jamoa hisoblanadi. Nima qilib bo'lsa ham ushbu uchrashuvda g'alaba qozonishimiz talab etilardi, yuklatilgan vazifani bajardik. "Buxoro" kuchlilar safida qolishni istasa, har bir turda g'alaba qozonishi kerak. Oldinda kutayotgan o'yinlar finalga teng, ortga yo'l yo'q.  

Har bir bellashuvga puxta va har tomonlama tayyorgarlik ko'rmoqdamiz. Ko'rayotgan bo'lsangiz tarkibimizda yoshlar ko'p, ular ham shu yo'sinda tajriba to'plab borishmoqda. Tajribali va mahoratli futbolchilarimizning aksariyati jarohat oldi, ko'p jamoadoshlarim betob bo'lgandi. Pandemiya sababli legionerlarimiz ham kela olishmadi. Murabbiy Jamshid Saidov yuzaga kelgan vaziyat sababli asosan yoshlarga ishonch bildirmoqda. O'ylashimcha, yosh iqtidorlar ishonchni oqlashmoqda. Maydonda ularga qo'limdan kelganicha yordam berishga harakat qilmoqdaman. Muhsin Muhammadievni yomon ishladi demoqchi emasman, uning ham o'ziga yarasha uslubi bor. 

Markazlashgan chempionat biz uchun qulayroq deb o'ylayman. O'z maydonimiz hali tayyor emas, shu bois Toshkentda o'tayotgan o'yinlar bizga har tomonlama maqul kelmoqda",- deydi Jasur Hasanov. 

Abdulaziz Iskandarov yozib oldi.