Jasur Azimov: Dinamo to'g'ri taktika sabab Neftchini yutdi

 Dastlabki gol muallifi o'yindan keyin fikrlari bilan o'rtoqlashdi.

- Farg'onada hech qaysi jamoaga oson bo'lmasligini oldindan bilardik. Ayniqsa, aynan Dinamo bilan o'yindan oldin Neftchida Vadim Abramovning bosh murabbiyga aylanishi o'yinga yanada yaxshiroq tayyorgarlik ko'rishimiz kerakligini bildirardi. SHu bois murabbiylarimiz 9 iyun kuni Samarqandda o'tgan So'g'diyona bilan bahsda aynan Neftchiga qarshi jiddiy tayyorlashdi. SHu kuni qarshi hujum taktikasini sinovdan o'tkazishgandi. Aynan ushbu tayyorgarlik evaziga Farg'onada qarshi hujum taktikasida yaxshi o'yin ko'rsatib, g'alabaga erishdik.

- Dinamo g'alabasini taminlagan asosiy jihat nima bo'ldi?

- O'ylaymanki, murabbiylarimiz Abramov jamoasiga qarshi to'g'ri taktika tanlashgani yutug'imizni taminladi. Neftchini o'yin davomida to'pga egalik qilib, Barselona uslubida, kichik paslar orqali o'yin ko'rsatishini bilardik. SHu bois, uchrashuv boshidan ularga o'yin bermaslikka harakat qilib, kuchli pressing va qarshi hujumda to'p surdik. O'yin boshida gol urganimdan keyin, Neftchi hujumkorlikni yanada oshirdi. Natijada qarshi hujumlardan foydalanish imkoniyati vujudga kelib, Farg'onadan g'alaba bilan qaytdik. G'alabasiz seriyamizga barham berganimizdan juda xursandmiz. Ammo, aytishim kerakki, Neftchi to'pga egalik qilib, katta bosim o'tkazdi. Oldinda bizni Lokomotiv bilan bahs kutib turibdi. Ushbu o'yinda ham muxlislarimiz ishonchini oqlash uchun harakat qilamiz.

Usmon Ibodov suhbatlashdi.