Janubiy Koreya futbolchisi: "Biz Rossiyaga boramiz"

Kelasi yil Rossiya mamlakatida bo'lib o'tadigan jahon chempionatiga saralash bahslari Osiyo qitasi uchun yakuniy pallaga etay deb qoldi. Janubiy Koreya 31 avgustda o'z maydonida Eron bilan o'ynaydi va shundan so'ng Toshkentga kelib 5 sentbyar kuni O'zbekiston terma jamoasi raqibi bo'ladi. 

Janubiy Koreya terma jamoasining 16-raqamli futbolchisi Jung Vu Yong FIFA rasmiy saytiga bergan intervyusida hech kim tushkunlik holatiga tushib qolmagani hamda barcha keyingi ikki o'yinga tayyorgarlik ko'rayotganini aytib o'tdi. 

- "Dunyoning barcha futbolchilari qatori biz jahon chempionatida ishtirok etishni xohlaymiz va hozircha hammasi o'z qo'limizda, - deydi 27 yoshli yarim himoyachi. - Oldinda ikkita o'yin qoldi va g'alaba qozonsak kelasi yil Rossiyaga boramiz". 

Bu futbolchi terma jamoasining JCH-2018 saralash o'yinlarida etti bor maydonga tushgan. U maydondagi eng yaxshi o'yinchilardan biri hisoblanadi. Uning aytishicha, 31 avgust kuni Eron bilan bo'ladigan bahs juda muhim ahamiyatga ega: "Eron hali yutqazgani yo'q va buni juda yaxshi bilamiz. O'ylaymanki, biz ularni mag'lub eta olamiz. Janubiy Koreya Osiyodagi eng kuchli termalardan biri va qitadagi istalgan raqib bilan o'ynay oladi". 

Jung Vu Yong faoliyatining asosiy qismini Yaponiya klublarida o'tkazgan. U "Kyoto Sanga", "Jubilo Ivata", "Vissel Kobe" kabi klublarda o'ynagan. Hozirda Xitoyning "CHuncin Lifan" klubida to'p tepyapti. Bu futbolchi yarim himoyaning tayanch nuqtasida harakat qiladi. Jung Vu Yong 2012 yilgi Olimpiada o'yinlarida ham ishtirok etgan. Terma jamoada esa 2015 yildan boshlab muntazam o'ynab kelmoqda.