Jamshid Saidov kechagi uchrashuvga "Qizilqum" nima sababdan bitta davvozabon bilan kelgani va legionerlardan foydalanmaganini tushuntirib berdi

O'yin haqida

- Oson o'yin bo'lmadi. O'zbekiston kubogi musobaqasida davom etayotganimizdan xursandman. Bugungi uchrashuvdagi mahorat uchun yigitlarga raxmat aytaman va tabriklayman. "Mashal" bizga jiddiy qarshilik ko'rsatdi, jamoa bugungi uchrashuvga yaxshi tayyorgarlik ko'rishgani sezilib turdi. Birinchi davrada og'ir o'yinlarni ko'p o'tkazdik, tatilga chiqishgani sabab bugungi uchrashuvga kela olmagan futbolchilarimiz ham bor edi. Asosan yosh futbolchilardan iborat tarkib bilan bilan ushbu o'yinga etib keldik. Muxlislarga ham minnatdorchilik bildiraman.

- Uchrashuvning asosiy vaqtida har ikki jamoa ham teng o'yin ko'rsatdi. Biroq, qo'shimcha bo'limlarda "Qizilqum" g'alabani osonlik bilan qo'lga kiritgandek ko'rindi. Buni qanday izoxlagan bo'lardingiz? Jamoangizda qo'shimcha bo'limlar uchun alohida tayyorgarlik rejasi bormidi?

- Asosiy vaqtda haqiqatdan o'yin teng kurashlar ostida o'tdi. Birinchi bo'limda hisobda oldinga chiqib oldik, ikkinchi bo'limda raqibni qarshi hujumda jazolamoqchi edik. Biroq vaziyat qo'shimcha bo'limlarga qadar etib bordi. Biz qo'shimcha bo'limlarda raqibga gol urish uchun imkoniyat bermaslikka intildik va o'z vaziyatlarimizdan foydalandik.

- "Qizilqum" bugun faqat bir nafar darvozabonni qaydnomaga kiritdi. Uning jarohat olish ehtimolidan cho'chimadingizmi?

- Albatta, bu katta tavakkal edi. Biroq, mavjud vaziyat tufayli shunga majbur bo'ldik. Yana bir darvozabonimiz betob bo'lib qoldi. 

- Legioner futbolchilarga tatil berilganmi?

- Ha, shunday. Legioner futbolchilar yozgi tatilga chiqishdi. Ular bir oz muddat oilalari davrasida bo'lishadi. To'g'risini aytganda, bor etiborimizni chempionat o'yinlariga qaratishni maqsad qildik. Biroq, bu degani kubok uchrashuvlari etibordan chetda qoladi degani emas. Mana shunday uchrashuvlar orqali yosh va o'yin amaliyotisiz qolayotgan futbolchilarni sinovdan o'tkazamiz. Maqsad o'zgarmaydi, har bir o'yinda g'alaba uchun maydonga chiqamiz.