Jamshid Saidov: "Georgiev mavsum oxirigacha safdan chiqdi, Ayupov oilaviy sabablar bilan klubdan ketdi"

"Biz oxirgi o'rindamiz, har bir o'yinga so'nggi uchrashuvga tushgandek tushayapmiz. Bugun O'zbekistonning eng kuchli klublaridan biri bo'lgan "Lokomotiv"ga qarshi o'ynadik. Ular ham, biz ham xato qilishga haqqimiz yo'q edi. Biroq mag'lubiyatga uchradik. Tarkibimizda bir qator jarohat olgan futbolchilar borligi ham pand berdi", - deydi Saidov.

- Aziz Ibragimov jarohat tufayli almashtirildimi?

- Taktikamiz bir hujumchi bilan qarshi hujumda o'ynash edi. Aziz raqib himoyachilarini bosimda ushlab turdi. Biroq jarohat tufayli uni almashtirishga majbur bo'ldim. 

- Birinchi bo'limda hisob 0:0 edi. Raqib penaltidan gol ura olmadi, ikkinchi bo'limda "Buxoro"ga nima etishmadi? 

- Bizga hujumdagi yakuniy zarba etishmadi. Aziz belidan jarohat oldi uni o'rniga Davlatov tushdi. Qarshi hujumda o'ynadik. Yigitlar har bir o'yinga o'zgacha shijoat bilan tushishmoqda. Oldinda 4ta tur bor.

- Jamoa oliy ligada qolishiga ishonasizmi?

- Oxirigacha kurashamiz. Buxorodek viloyatga oliy ligada klub kerak. Tarkibimizda yo'qotishlar juda ko'p: Georgiev mavsum oxiriga qadar safdan chiqdi, Antonyuk yaqinda jarohatidan qutuldi, Timur Ayupov oilaviy sabablar tufayli klubdan ketdi.