Jamshid Saidov: "Buxoro"ning g'alabalari oldinda ekanligiga ishonaman"

“Bugungi g'alaba bilan “Paxtakor” jamoasini tabriklayman. Bugun biz mamlakatimizning eng kuchli jamoasiga qarshi harakat qildik. Afsuski, bugun ham “Bunyodkor”ga qarshi kechgan bahsga o'xshab 2-3ta qo'pol xatolarimizdan so'ng gol o'tkazib yubordik. Ikkinchi bo'limda ustunlik biz tomonda bo'lishiga qaramay, so'nggi zarbani beruvchi futbolchi topilmayapti.

Men futbolchilarimga rahmat aytmoqchiman. Ular bugun borini berib o'ynashdi. Ular harakat qilishyapti, o'yindan o'yinga futbolchilarda o'sish bor. Ular endi-endi bir-birlarini tushunib o'ynashni boshlashmoqda.

Turnir jadvalidagi o'rnimizni ko'rib, futbolchilar katta bosim ostida qolishmoqda. Muxlislarni ham tushunaman, ularga natija kerak. Hozir biz katta bosim ostida qolib ketyapmiz. Mashg'ulotlarni ham yopiq eshiklar ortida olib borishga majburmiz. Muxlislarni hozircha mashg'ulotlarga qo'ymayotganimizning sababi, futbolchilarni ortiqcha bosimdan xoli qilishdir.

Men bir narsani ishonch bilan aytmoqchiman, men, rahbariyat va barcha murabbiylar shtabi jamoaga, futbolchilarimizga ishonamiz. Men kelajakka umid bilan qarayapman. Hali “Buxoro”ning g'alabalari oldinda ekanligiga ishonaman”- dedi Saidov.