Jamoliddin Rahmatullaev: "Ishlashimiz kerak bo'lgan jihatlar ko'p"

Vakillarimiz kecha Ozarbayjon U-18 terma jamoasi bilan kuch sinashdi (0:0).  Uchrashuvdan so'ng terma jamoamiz bosh murabbiyi Jamoliddin Rahmatullaev fikrlarini bildirdi. 

"Kechagi Ozarbayjon jamoasiga qarshi o'yinga keladigan bo'lsak, o'yin yomon bo'lmadi. Futbolchilar bergan ko'rsatmalarimni maksimum darajada bajarishga harakat qilishdi. To'g'ri, o'yinda hisob ochilmadi, realizaciyada muammolar bo'ldi. Buni tahlil qilib, albatta, mashg'ulotlarda ishlaymiz. Eng muhimi, biz juda ko'p golli vaziyatlar yaratdik. Raqib ko'proq himoyaga etibor qaratgan bo'lsa-da, bizda etarli imkoniyatlar bo'ldi.

Futbolchilarga qo'yilgan vazifalarimdan yana biri — to'pni yo'qotgandan keyingi holatimiz edi. Bu jihatda ham yigitlar yaxshi ko'rinishdi. To'g'ri, hali ishlashimiz kerak bo'lgan jihatlarimiz juda ko'p, lekin oxirgi ikki yig'inda yigitlarning har tomonlama progressi meni xursand qilmoqda. Biz nafaqat maydondagi holatlarni, balki maydon tashqarisidagi, yani muhitni, jamoaviy birdamlikni, futbolchilarning o'zlariga bo'lgan ishonchini va, albatta, vatanparvarlik ruhini oshirishga harakat qilyapmiz.

12 oktyabr kuni ikkinchi o'yinimizni o'tkazamiz. Bu bahsda qolgan yigitlarga ham imkoniyat berishni reja qilganman. Ishonchim komilki, ular ham o'zlariga berilgan imkoniyatdan maksimum darajada foydalanadilar", - deydi Jamoliddin Rahmatullaev.