Jamoasini 2 ta muqarrar goldan saqlab qolgan posbon, "Neftchi" darvozasini jarimadan ishg'ol qilgan futbolchi - Superligada 12-tur laureatlari

"Championat.asia" o'tkazilgan bahslar asosida tur laureatlarini aniqladi.

OKMK posboni Botirali Ergashev "Championat.asia" sayti talqiniga ko'ra 12-turning eng yaxshi darvozaboni deb topildi. 

Olmaliqliklar darvozaboni ortda qolgan turda jamoasini 2 marta muqarrar goldan saqlab qoldi. Uning ikkinchi seyvidan keyin OKMK hujumga o'tib ketdi hamda uchinchi golni urib, hisobni mustahkamladi. Umuman, Ergashev OKMKning ishonchli hisobda g'alaba qozonishida (3:1) katta rol o'ynadi.

"Paxtakor" hujumchisi Dragan CHeran "Championat.asia" talqinida 12-turning eng yaxshi futbolchisi deya elon qilindi.  

Tajribali futbolchi o'z harakatlari bilan o'yin davomida ajralib turdi. CHeran yana bir marta "klass"ini namoyish qilib, "sher"lar foydasiga g'alaba olib keldi. Bundan tashqari, hujumchi bahs davomida himoyaga qaytib, mudofaa vakillariga yordamlashdi va standartlardagi ikkinchi qavatda ko'p marta raqiblardan ustun keldi.

"Qizilqum" yarim himoyachisi Islomjon Toshpo'latovning "Neftchi" darvozasiga kiritgan to'pi "Championat.asia" talqiniga ko'ra 12-turning eng chiroyli goli (VIDEO) deb tan olindi. 

Navoiyliklar azosi "Neftchi" bilan uchrashuvda jarimadan kuchli zarba yo'llab, Vladimir Nazarovga hech qanday imkoniyat qoldirmadi va muvozanatni tikladi.

"Nasaf" bosh murabbiyi Ro'ziqul Berdiev "Championat.asia" talqiniga ko'ra 12-turning eng yaxshi murabbiyi sifatida etirof etildi.

"Bunyodkor"ga qarshi o'yindagi voqeliklar tufayli 5 ta o'yinga chetlashtirilgan qarshiliklar ustozi jamoasini Jizzaxdagi bahsga yaxshi tayyorlagani bilindi. "Nasaf" mehmonda o'ynaganiga qaramay, muhim 3 ochkoni qo'lga kiritdi.