Jahon chempionatigacha: Bentuda terma jamoani tayyorlash uchun qancha vaqt bo'ladi?

Sir emaski, terma jamoalar klubga o'xshab har kuni emas, faqat FIFA kunlarida yig'ilishadi. Jamoa ustozi esa mana shu kunlardagina unumli foydalanib o'z uslubini, taktik qarashlarini singdiradi. Xo'sh, Bentu terma jamoamizni qo'lga olsa, Jahon chempionatiga qadar tayyorgarlik uchun qancha vaqt bo'ladi?

CAFA turnirini o'z ichiga olgan bu FIFA kunlarini hisobga olmaymiz. Kapadze katta ehtimol shu bilan ishini tugatib qo'yadi. 

Bentu ilk yig'inni 6-14 oktyabr kunlari olib boradi. Unga qadar Superliga, Elit OCHL, OCHL uchrashuvlari bor. Demak oktyabr oyidagi FIFA kunlarida 2 ta uchrashuv o'tkazish imkoniyati mavjud.

Navbatdagi o'quv-mashg'ulot yig'inlari FIFA kunlarining 10-18 noyabr sanalariga to'g'ri kelmoqda. Xalqaro maydondagi klublarimiz uchun mavsum dekabr oyida yakunlanadi. Taqvimga ko'ra 21 dekabrdan 18 yanvargacha bo'sh kunlar bor, lekin futbolchilar tatilda bo'lishini va mavsumni kech tugatishini hisobga olsak, yanvar oyida yig'in tashkil qilishi ehtimoli bor. Lekin futbolchi mavsumga klubi bilan to'liq tayyorgarlik qilishi kerak. Yanvarda Bentu yig'in o'tkazadimi yoki yo'q aniq emas. Uning qarashlari qanday, qachon va qaysi payt yig'adi bilmaymiz.

Mart oyining boshida ichki chempionat bahslari start oladi. Xalqaro maydondagilar uchun undan avvalroq. Endi O'zbekiston terma jamoasi 23-31 mart sanalarida to'planishadi va tayyorgarlikni davom ettirishadi. Bunda ham 8 kunlik muddat belgilangan. 

Oxirgi tayyorgarlik jarayonlari 1-9 iyun sanalari oralig'ida bo'lib o'tadi. 

Umumiy hisobda plyus-minus 40 kunga yaqin vaqt bor ekan. Bu erda yanvar oyidagi yig'inlar inobatga olinmagan. Ehtimol sifatida ko'rilgan.