Italiya yana JCH saralashida omadsizlikka duch keldi - oldinda o'tish o'yinlari. Buyog'iga nima bo'ladi?

2026 yil malum va mashhur, afsonaviy "San-Siro" 100 yoshni qarshi oladi. Fevral oyida u erda Olimpiada o'yinlari ochilish marosimi o'tkazilishi rejalashtirilgan, ammo undan so'ng arenani buzib tashlanishi kutilmoqda — va o'sha joyning o'zida butkul boshqa stadion qad rostlaydi.

Katta ehtimol bilan yakshanba oqshomida Italiya terma jamoasi buyuk to'qnashuvlarga guvoh bo'lgan "San-Siro"da o'zining oxirgi o'yinini o'tkazdi: deyarli liq to'lgan tribunalar qarshisida imkonsiz qolib, Norvegiyaga yutqazib qo'ydi va tarix sahifalarida noxush o'chmas bir iz qoldirdi. Ha, hech kim Gattuzo jamoasidan Norvegiyaga qarshi bahsda mo'jiza kutmayotgandi, lekin kichik hisobdagi g'alaba yoki hech bo'lmasa durang, Oslodagi 0:3dan keyin, italiyaliklarni saralash borasidagi taassurotlarini biroz bo'lsada yaxshi tomonga o'zgartirardi. Biroq Italiyani qatorasiga uchinchi JCHsiz qoldirishga yaqin turgan jamoa buni uddalay olmadi va yirik hisobda mag'lub bo'ldi (1:4).

Gattuzoning bosh murabbiy sifatidagi sarguzashtlari davom etayotgandek. Klublar miqyosida uning uzluksiz omadsizliklari va rahbariyat bilan mojarolari kutilmagan yangilik bo'lmay qolgan. Endi bu terma jamoa darajasida takrorlanayotgandek. Eng kamida Gattuzo kollekciyasi Norvegiya bilan juda katta omadsizlik punkti bilan to'ldirildi. Ha, Erling Xoland boshchiligidagi skandinavlar kuchli jamoa, lekin bu darajada emas-ku! To'rt karra jahon chempionlarini "San-Siro"da bunday mag'lubiyat alamini totishga majbur qilish uncha-muncha jamoaning qo'lidan kelmasdi!

Ikki o'yin natijasiga ko'ra 1:7 va guruhdagi ikkinchi o'rin Italiyani o'tish o'yinlariga ravona qilmoqda. Birinchi bahs 26 mart sanasiga belgilangan: "Skuadra adzurra" o'z uyida o'ynaydi, lekin bu Milanda bo'lmasa kerak. Ikki raqibdan biri hafta oxirida Cyurixda bo'ladigan qurada aniqlanadi. Bu Italiyani Rossiyadagi mundialga o'tkazmagan Shveciya bo'lishi mumkin, yoki Qatardagi JCHdan mosuvo qilgan Makedoniyani hal qiluvchi bahsda 7:1 hisobida er tishlatgan Uels termasi bo'lishi mumkin. O'tmishga qarasa og'riqli vaziyatlar etarli, bugungi kun va kelajak esa so'roq ostida qolgan.

Agarda 26 mart kuni Italiya g'alaba qozongan taqdirda, 31 mart sanasida gipotetik jihatdan Slovakiya, Chexiya yoki Daniya bo'lishi mumkin. "Skuadra adzurra"ning hozirgi holatida ularning hech biri o'zini autsayder sifatida ko'rmaydi.

Saralashni jamoa Spaletti boshchiligida Oslodagi yirik hisobdagi mag'lubiyatdan boshlagandi, yakun Milanda, yana yirik hisobdagi mag'lubiyat — lekin murabbiylik kursisida bu safar Gattuzo. Luchano jamoa boshqaruvini o'z qo'lidan chiqarib yuborgandi, Jennaro esa qisqa fursat ichida nimalarnidir o'zgartirishga urinib ko'rdi, ammo bu faqatgina guruhja ikkinchi o'rinni Isroilga berib qo'ymaslik uchun etarli bo'ldi.

2026 yil mart oyi Italiya terma jamoasi uchun og'ir o'tishi turgan gap. Jamoa bu sinovdan o'ta olarmkin? Omadsizlik nafaqat Gattuzoni, balki mamlakat futbol federaciyasi prezidenti Gabriele Gravinani ham kursisidan mahrum etadi. Boshqa tomondan bu masalaning kichik detallari.

Asosiy savol: Italiya dunyo grandlari qatoriga qaytishi uchun nima etishmayapti? Italiya futboli afsonalaridan biri Dino Dzoff asosiy "aybdor" A Seriya ekanligini takidladi. Siz bu borada qanday fikrdasiz?