Intervyu. Zoran Marushich - "Torpedo" va "Neftchi"dan taklif bo'lgani, hakamlik va maydonlar, Yaxshiboev hamda Murzaev raqobati

Suhbatdoshimiz "Navbahor"ning serbiyalik hujumchisi Zoran Marushich. Ayni paytda 8ta gol bilan jamoasining to'purari bo'lib turgan forvardga bir nechta savollar bilan murojaat qildik. Aytish mumkinki, u qishda "Torpedo" yoki "Neftchi"ga yo'l olishi mumkin edi. Lekin yakunda "Navbahor" variantida to'xtaldi. Bu haqida batafsil quyida. 

- Zoran keling suhbatimizni siz gol muallifiga aylangan "Surxon"ga qarshi o'yin haqidagi fikrlaringiz bilan boshlasak...

- Rahmat. Jamoadagilar o'yin oson bo'lmasligini va masuliyatni his qilib turgandi. Avvalgi o'yinga qaraganda yanada og'ir bo'lishini kutganimiz rost. Etarlicha tayyorgarlik ko'rib maydonga chiqdik va 3 ochko oldik. Bundan barcha xursand. 

- Ayni paytda 8ta gol urgansiz va mavsum yakuniga qadar o'yinlar ko'pligini hisobga olganda yana nechta to'p kiritishni rejalashtiryapsiz?

- Hozirgi ko'rsatkichlarimdan yanada yaxshirog'ini qayd etish uchun ishlamoqdaman. Biroq to'g'risini aytganda men uchun jamoam birinchilikni boy bermasligi muhim ahamiyat kasb etadi. 

- Yuqoridagi natijani o'zingiz uchun etarli, deb hisoblaysizmi?

- Bunday o'ylamayman. Men maydonda borimni beraman. Xulosani esa mavsum yakunida bergan maqul.

- Davralar oralig'ida hujumdagi raqobatni kuchaytirish uchun Mirlan Murzaev va Jasur Yaxshiboev taklif qilindi...

- Jamoaga juda yaxshi kirishib ketishdi. Bu hujumchilarni yomon, demagan bo'lardim. Ularning yordamida o'yinimiz yanada kuchayadi va yaxshilanadi, deya olaman. Maqsadimizga erishishimizga yordam berishadi. 

- Aksariyat legionerlar O'zbekistonga kelishdan avval bu erda to'p tepish oson, deb o'ylashadi. Kelganlaridan so'ng aksincha fikr bildirishadi. Sizda bu borada qanday xulosalar bor?

- Osiyoda to'p tepish ko'nikmasi menda yo'q edi. O'zbekistonda o'ynagan do'stlarimdan bu haqida so'radim. Bu shunchaki oddiy chempionat emas. SHaxsan o'zim buni ko'rdim. O'yinlar, natijalar aytib turibdi. Jismoniy jihatdan ko'p kuch talab qiladigan liga. 

- Eshitishimga qaraganda sizni qishda "Torpedo" va "Neftchi" o'z safiga qo'shib olmoqchi bo'lgan...

- To'g'ri. Biz muzokaralar o'tkazdik. Yakunda shuni his qildimki, "Navbahor" bilan maqsad va vazifalarimiz yagona. Men "Navbahor"ni, "Navbahor" esa meni tanladi. 

- CHetdan kelgan legioner sifatida Superligadagi tashkilotchilik, hakamlar va maydonlarga qanday baho berasiz?

- Tashkilotchilikka to'xtalsam, barchasi yaxshi darajada. Yanada yaxshilash uchun harakat qilishayotgani quvonarli. Futbol maydonlari ajoyib holatda. Muxlislar tinimsiz qo'llab-quvvatlashadi. Hakamlarning professional darajada ishlashayotgani yoqimli. To'g'ri har bir o'yinda 50/50 vaziyatlar bo'lyapti. Ular futbol qoidalariga, standartlariga rioya qilishadi. SHu bois fikrlarim ijobiy.