Ilhomjon Qunduzov: “Qo'qon-1912” jamoasi hech qachon yolg'iz qolmaydi”

Ilhom Qunduzov boshchilik qilayotgan muxlislar klubi mavsumning ikkinchi qismida ham futolchilarni qo'llab-quvvatlash borasida boshqalarga o'rnak bo'lishni maqsad qilishgan. Xususan, birinchi davradagi ayrim safar o'yinlarda “Qo'qon-1912” jamoasi muxlislar klubi ko'pchilikning havasini keltirgandi.

Ikkinchi davra arafasida “Qo'qon-1912” jamoasi muxlislar klubi raisi Ilhomjon Qunduzov bilan qisqacha suhbatda bo'ldik.

– Futbolchilar qatori “Qo'qon-1912” jamoasi muxlislar klubi ham ikkinchi davrani intiqlik bilan kutmoqdamiz, deb so'z boshladi Ilhomjon Qunduzov. – Ayni damda qo'qonlik futbol ixlosmandlarining kayfiyati alo. Ular jamoadagi o'zgarishlardan xursand bo'lishmoqda. O'ylaymanki, ikkinchi davrada “Markaziy” o'yingohga muxlislar tashrifi yana oshadi. Jamoamizning yozgi transferlari muxlislarga manzur bo'ldi. Hamma bosh murabbiy No'mon Hasanovga katta umid bog'lagan. Klub rahbariyati ham bizga etarlicha sharoitlarni yaratib berishdi. Buning uchun ularga o'z minnatdorchiligimizni izhor etmoqchimiz.

Aytgancha, O'zbekiston Kubogi chorak final javob uchrashuvi doirasidagi “Buxoro”ga qarshi bo'ladigan o'yinni bevosita stadionda kuzatish maqsadida 10 nafarga yaqin muxlis Buxoroga borishdi. “Buxoro” jamoasi muxlislar klubi bilan hamkorlikni yo'lga qo'yganimiz bois, buxoroliklar ham bizning ishqibozlarimizni yaxshi kutib olishdi. Buxorolik muxlislarga ham rahmat aytamiz.

Yana bir gap. Haqiqiy muxlis degani har qanday holatda ham jamoani qo'llab-quvvatlaydi. Futbolda har doim ham o'zimiz kutgan natija qayd etilavermaydi. SHunday bo'lsa-da, fidoiy muxlislar hamisha jamoa bilan birga bo'lishadi. Bu albatta tahsinga loyiq. Quvonarlisi, “Qo'qon-1912” jamoasining fidoiy ishqibozlari bisyor. Biz hech qachon sevimli jamoamizni yolg'izlatib qo'ymaymiz.

Ikkinchi davrada “Qo'qon-1912” jamoasiga omad tilaymiz.