Ilhom Mo'minjonov: "Yigitlar ko'rsatmalarni to'g'ri bajarishdi"

O'yin haqida

- Birinchi navbatda jamoamiz azolari va "Neftchi" muxlislarini g'alaba bilan tabriklayman. Ochkolar jamg'arishda davom etamiz. Albatta bugun qiyin o'yin bo'ldi, g'alaba osonlikcha qo'lga kiritilgani yo'q. Yigitlar o'yin davomida berilgan ko'rsatmalarni to'g'ri bajarishdi. Bugungi o'yin bilan birinchi bosqich yakuniga etdi. Ertaga 2-bosqichga qura tashlanadi. SHundan kelib dastlabki raqiblarimizni bilib olamiz.

- "Olimpik" jamoasi bosh murabbiyi Timur Kapadze o'z intervyularidan birida "Istiqlol" stadioni maysalari va xolatini salbiy baholadi. Bu haqida fikringiz qanday? 

- "Istiqlol" stadionida uy o'yinlarimizni, shuningdek mashg'ulotlarni o'tkazayapmiz. Stadion rahbariyati va xodimlari maydon maysalarini mukammal xolatga keltirish bo'yicha ishlashmoqda.

- Katta ehtimol jamoangiz Superligaga yaqin turibdi. Agar Superliga yo'llanmasi qo'lga kiritilsa "Istiqlol" stadioni maysalari yuqori liga o'yinlariga qadar shay xolatga keladimi?

- Albatta tayyor bo'ladi. Hozir bu borada ishlar olib borilmoqda. Maydon maysasi 7-8 avval qo'yilgan ekan. Hozir bu borada ishlar jadal suratda davom etmoqda.

- Muxlislardan kelgan savollar. Doston Toshmatov nega maydonga tushmayapti? SHuningdek, "Neftchi"ning U-18 jamoasidan asosiy tarkibga mos futbolchilar bormi?

- Doston Toshmatovning iqtidoriga shubha yo'q. Lekin hozir bizda hujum chizig'ida raqobat kuchli. Doston bizga kerak va albatta keyingi o'yinlarda maydonga tushiramiz. 

"Neftchi"ning U-18 jamoasi o'zi ishtirok etayotgan chempionatda bejizga birinchi o'rinda ketayotganlari yo'q. Albatta yoshlar jamoamiz tarkibida mahoratli futbolchilar bor. Biz ularni bosqichma-bosqich asosiy tarkibga jalb etib boramiz.