Ilhom Mo'minjonov: "Abdunabiev o'zini ko'rsata oldi. Muhim ochkolarni jamg'arishda davom etamiz"

"Bugungi g'alaba bilan muxlislarimizni va rahbariyatni tabriklayman. Futbolchilar maydonda bor kuchini berishdi. Bor mahoratini ko'rsatgan holda yurakdan mehnat qilishdi", – deydi Ilhom Mo'minjonov.

- Ruslan Roziev va Ulug'bek Hoshimov o'yin qaydnomasidan joy olmagani nima bilan bog'liq?

- Hoshimov va Roziev yoshlar terma jamoasi azolari hisoblanadi. Ayni paytda ular o'quv-yig'in mashg'ulotini o'tkazishmoqda. Qolaversa yaqinda xalqaro turnirda ishtirok etishadi. Ularning yo'qligi qaysidir manoda bilindi, desak ham bo'ladi. Lekin hozirgi kunda zaxiramiz yaxshi futbolchilardan iborat. Izzat Abdullaev, Sardor Abdunabiev. Ayniqsa Sardor bugun o'zini ko'rsata oldi. Keyingi o'yinga qadar Roziev va Hoshimov safimizga qaytadi. 

- Sardor Abdunabiev ketma-ket gollar urayotganida zaxiraga olindi...

- U yosh futbolchilarimizdan biri. SHu vaqtga qadar gollar urib kelayotgandi. Kubokda "Xorazm" darvozasini ishg'ol qildi. Uning mahorati va salohiyatini bilamiz. Zaxiraga olingani sababi boshqa futbolchilarga imkoniyat berishga qaror qildik. Zaxiradan maydonga tushgan futbolchilar berilgan vaqtdan unumli foydalana olishmadi. Keyingi uchrashuv "Buxoro"ga qarshi kechadi. Jiddiy tayyorgarlik ko'ramiz. U erda ham yaxshi jamoa shakllangan. 

- Zaxiradan maydonga tushgan futbolchilarda faollik ko'zga tashlanmadi. Yani o'yin amaliyoti kamligi sezilib qoldi...

- O'yindagi hisob ham bunda rol o'ynadi, deb o'ylayman. O'zim ham vaqtida futbolchi bo'lganman. Hisob juda yirik ko'rinish olgan paytda tushishgani uchun xotirjamlikka berilishdi. Xatoga yo'l qo'yishdi. O'yin amaliyoti kamligi tasir qilmasligi kerak. Bahs tempi ularni to'xtatib qo'ydi. Muhim ochkolarni jamg'arishda davom etamiz.