Ibrohim Ibragimov: "Xitoyni 3:1 emas, 5:1, 6:1 hisobida ham yutishimiz mumkin edi"

Timur Kapadze shogirdlari kecha Xitoy U-23 terma jamoasiga qarshi maydonga chiqdi (3:1). Mazkur uchrashuvdan so'ng terma jamoamiz yarim himoyachisi Ibrohim Ibragimovning fikrlari bilan qiziqdik.

- Xitoy bilan o'yin haqida...

- O'yin yaxshi o'tdi. Birinchi bo'limda raqib chuqur himoyalandi. Biz esa ikki xil tarkibda maydonga tushdik. Murabbiyimiz barchaga imkoniyat berdilar. Ikkinchi bo'limda o'yin ochildi. Golli vaziyatlar ko'paydi. Xitoyni 3:1 emas, 5:1, 6:1 hisobida ham yutishimiz mumkin edi. 

- Qirg'iz Respublikasi bilan o'yinga qaraganda farq nimada bo'ldi?

- Xitoy qiziqarliroq jamoa ekan. Faqat realizaciyada oqsayapmiz. Hamma raqibni hurmat qilamiz. Yigitlar bor kuch bilan harakat qiladi. 

- O'zbekistonga qarshi ko'p jamoalar himoyaviy o'yin ko'rsatmoqda. Murabbiylar bu borada qanday ko'rsatmalar beryapti?

- To'g'ri aytdingiz. Himoyaviy o'yin taklif qilmoqda. Mashg'ulotlarda ishlayapmiz. CHuqur himoyalangan raqibga qarshi doim qiyin. Ochiq o'yinga qaraganda bu ancha murakkabroq. 

- U-20 terma jamoasidan kelgan yangi futbolchilar qay darajada kirishib ketishdi?

- Yaxshi, o'zlarini ko'rsatishmoqda. Mahmud, Umarali, Saidafzalxon tez kirishib ketishdi. Aka-ukadek bo'lib ketganmiz. Mahmud, Umarali gol urishdi. Ikkinchi o'yinga tayyorgarlikni boshlaganmiz. Birinchi o'yinga qaraganda qiyinroq bo'lishi tabiiy. CHunki bizni ko'rdi, o'rgandi. G'alaba uchun maydonga chiqamiz.

Abdulaziz Iskandarov suhbatlashdi