Husniddin G'ofurov: Serbiyada legionerlarga oson emas

- Husniddin, Voyvodinaga qarshi o'yindagi mag'lubiyatni qanday izohlaysiz?

- Ochig'i, bu savolga hozirgacha javob topa olmayapmiz. O'yinni yomon boshlamagan edik. Lekin o'z xatoimiz evaziga to'p o'tkazib yubordik. Aslida bu uchrashuvda kamida durangga haqli edik. SHu o'rinda raqib jamoaning kuchli ekanligini ham etirof etmay iloj yo'q. Voyvodina Evropa Ligasida muvaffaqiyatli odimlayapti. Italiyaning Sampdoriya klubini safarda 4:0 hisobida mag'lub etganining o'zi u qanday salohiyatga ega ekanligidan dalolat.

- Avvalgi o'yinlar bilan taqqoslaganda bu safar maydonda bir bo'lim davomida harakat qildingiz. Bosh murabbiy zaxira olinishingiz sabablarini aytdimi?

- Menimcha, o'yinim qovushmagani uchun boshqa futbolchiga almashtirdi. Tan olish kerak, o'sha kuni omad kelmadi. Qolaversa, chap qanot himoyasida o'ynayotgan jamoadoshim bilan ham kelisholmay qoldim.

- Bunga nima sabab bo'ldi?

- Aksariyat chempionatlardagi kabi Serbiyada ham legionerlarni xushlashmaydi. Balki shuning uchun mahalliy futbolchi bilan chiqisha olmay qolgandirman. Yanglishmaydigan insonning o'zi yo'q. Bitta xatoga yo'l qo'ysangiz, darrov gapirishadi. Mahalliy futbolchi ana shunday xatoning 10tasini qilsa ham lom-mim deyishmaydi.

- Klubingizda legionerlarga munosabat yaxshi emasmi?

- SHunday desa ham bo'ladi. Jamoaning tajribali, yoshi katta futbolchilari gapirsa alam qilmaydi. Lekin o'tengdoshlaring etiroz bildirsa, bunga chidash qiyin

- Mazkur masalada bosh murabbiy bilan gaplashdingizmi?

- Hozircha bunday qilmadim. Lekin holatni shundayligicha qoldirib bo'lmaydi.

- Bu mavsumdan yana Serbiy oliy ligasida qatnashyapsizlar. Dastlabki ikki turda g'alabaga erishdinglar. Muvaffaqiyat har doim yoqimli tatisa kerak?

- Albatta, bundan juda xursandmiz. Kuchlilar safiga bir yilning o'zidayoq qaytganimiz yaxshi bo'ldi. Ayniqsa, ilk turdagi uchrashuvimiz ancha murakkab kechdi. Ikkala jamoa ham qiynaldi. Ushbu uchrashuvda uch ochkoni qo'lga kiritganimiz bizga keyingi o'yinda qo'shimcha kuch bag'ishladi. SHu bois, 2-tur bahsida ortiqcha qiyinchiliksiz zafar quchdik. To'p nazoratida ham, xavfli vaziyatlarni yuzaga keltirish bo'yicha ham ustunlikka erishdik. Bosh murabbiyimizni ham alohida etirof etish joiz. Jamoani ruhiy jihatdan tayyorlashda ustozimizning hissasi katta edi.

- Buni mavsum avvalidagi kutilmagan natijaga yo'yish mumkinmi yoki haqiqatan ham jamoa oldiga bu yil jiddiy vazifalar qo'yilganmi?

- Xabaringiz bo'lsa,joriy yildan Serbiya chempionati pley-off ko'rinishida o'tkazilyapti. Dekabrgacha 23ta bahsda maydonga tushamiz. Oldimizga qo'yilgan birinchi galdagi vazifa kuchli sakkizlikdan joy olish. Keyingi bosqichda esa sovrinli o'rinlar uchun kurashni davom ettiramiz.

- Mavsumlar oralig'ida qanday o'zgarishlar ro'y berdi?

- Jamoani 5-6 nafar futbolchi tark etdi. O'z o'rnida 4-5 nafar yangi o'yinchilar qo'shildi. Murabbiylar shtabi ko'proq yoshlarga etibor qaratyapti.

- Yangi qo'shilganlar orasida legionerlar ham bormi?

- Ha, bir nafar xorijlik futbolchi keldi. Lekin unga yangi so'zini ishlatish unchalik ham to'g'ri emas. Zero, braziliyalik Elmar Silva avval ham Yavor sharafini himoya qilgan.

- Dastlabki ikki o'yinda ham boshlan-g'ich tarkibda maydonga tushdingiz. Birinchisida 71, ikkinchisida 57-daqiqada almashtirildingiz. Sizda o'sha paytda jarohat bormidi yoki murabbiy hujumni kuchaytirish maqsadida shunday yo'l tutdimi?

- SHukurki, jarohatim yo'q. Birinchi o'yinda charchab qoldim shekilli, murabbiylar buni anglagan holda almashtirishdi. Ikkinchi uchrashuvda zaxiradagi o'yinchilarga imkoniyat berish maqsadida shunday yo'l tutishdi. CHunki 2:0 hisobida oldinga chiqib olgandik.

- Serbiya chempionati avvalgi yillar bilan taqqoslaganda kuchaygandek ko'rinyapti...

- Albatta. Buni ortda qolgan uchta tur o'yinlari ham ko'rsatib turibdi. Kutilmagan natijalar qayd etilyapti. O'ylashimcha, bu yilgi chempionat avvalgisi bilan taqqoslaganda ancha qiziqarli kechadi.

- Bosh murabbiy bilan munosabatingiz qanday?

- Ko'z tegmasin,jamoa ustozi bilan munosabatlarimiz yaxshi. Futbolchining vazifasi murabbiy tanlamasdan, maydonda borini berib o'ynash.

- SHartnoma qancha muddatga imzolangan?

- Yana bir mavsum o'ynayman.

- Hali ham bazada yashayapsizmi?

- Yo'q, alohida xonadon berishgan.

- Mavsumlar oralig'ida O'zbekiston klublaridan taklif tushmadimi?

- Hozircha oliy liga haqida o'ylayotganim yo'q. Serbiya chempionatida o'ynash orqali Evropaning kuchliroq chempionatiga o'tishni maqsad qilganman. O'ylaymanki, yaqin orada bu orzuyimga erishaman.
 

Kamoliddin Alimov suhbatlashdi