Hamidulla Qarchig'aev: Qizilqumning o'z maydonidagi barcha o'yinlari TV orqali jonli namoyish etiladi

Futbolchilarning yuksak saviyada o'yinlar namoyish etishlari uchun Viloyat hokimligi, viloyat futbol federaciyasi, xomiylar barcha shart-sharoitlarni yaratib berishyapti.

Qisqa fursatda Rita-Invest O'zbekiston - Janubiy Koreya qo'shma korxonasi hamkorligida Navoiydagi Yoshlar sport majmuasi xalqaro talablarga javob beradigan holatga keltirildi. Futbol maydoni chimi to'liq almashtirildi. Xorijdan texnika va zarur asbob-ukunalar keltirildi. Stadion darvozalari ham Germaniya olib kelib o'rnatildi. Futbolchilarning yuvinish, kiyinish xonalari jahon standartlari asosida jihozlanganligi etiborga molik.

Yana bir quvonarli jihati, Qizilqum jamoasining o'z maydonida o'tkazayotgan o'yinlari Navoiy viloyat teleradiokompaniyasi ijodkorlari tomonidan to'g'ridan-to'g'ri tasvirga olinib, oynai jahon orqali namoyish qilinmoqda. Dastlab uchinchi tur doirasida o'tkazilgan Qizilqum - Olmaliq jamoalari uchrashuvi ilk bor to'g'ridan to'g'ri teletomoshabinlar hukmiga havola etilgandi.

- Viloyatimizda millionlar o'yini - futbolni rivojlantirishga katta etibor qaratilmoqda, - deydi Navoiy viloyat teleradiokompaniyasi rahbari Hamidulla Qarchig'aev. -  Bunga biz teleijodkorlar ham o'z hissamizni qo'shishga bel bog'laganmiz. Beshinchi turdan joy olgan Qizilqum - Paxtakor jamoalari uchrashuvini viloyatimiz teletomoshabinlari to'g'ridan to'g'ri oynai jahon orqali kuzatib borishganidan tashqari, mazkur o'yin teletasvirini ilk marotaba Sport  telekanaliga taqdim etdik. Natija yomon bo'lgani yo'q. To'g'ri, dastlabki tasvirlarda ayrim juziy kamchiliklar yuz bergan bo'lishi mumkin. SHu bois, hamkasblarimiz o'z ustilarida jiddiy ishlab, ko'proq ijodiy izlanishga harakat qilishyapti. Bu borada bizni amaliy jihatdan qo'llab-quvvatlayotgan viloyat hokimligiga o'z minnatdorchiligimizni bildiramiz. Hozir uchrashuvlar to'rtta telekamera orqali tasvirga olinayotgan bo'lsa, yaqin kunlarda ular soni oltitaga etkazilishi ko'zda tutilgan. Yaqinda yangi va zamonaviy teleuskuna va jihozlarga buyurtmalar berdik. Muhimi, ijodkorlarimiz muxlislar uchun qulaylik va yangi imkoniyatlar yaratishdan o'zimizni baxtiyor hisoblaymiz. Qizilqumning o'z maydonidagi barcha o'yinlar oynai jahonda to'g'ridan to'g'ri namoyish etiladi.

Ayni paytda Qizilqum jamoasi ishtirokidagi o'yinlarni respublikamiz futbol muxlislariga yaxshi tanish, mohir sport sharhlovchisi Rahmonqul Boltaev to'g'ridan to'g'ri stadionning o'zidan sharhlab bormoqda.

Viloyat teleijodkorlari kelgusida har bir tur uchrashuvida o'yinoldi va o'yindan keyin Qizilqum jamoasi va raqiblarning futbolchilari, murabbiy-mutaxassislari, shuningdek, muxlislar bilan tezkor intervyular uyushtirishni hamda oynai jahon orqali namoyish etishni ham rejalashtirishgan.