Hamidjon Aktamov: “Mavsum Navoiyda kuchli jamoa shakllanishi uchun o'ziga xos poydevor bo'ldi”

- Mavsumni g'alaba bilan yakunlash yoqimli, albatta, - deya so'z boshladi Hamidjon G'ulomovich. - Bugungi chiroyli futbol uchun yigitlarga katta rahmat! Yildan yilga chempionatda mavqeimizni tiklab borayotganimizdan xursandmiz. Viloyatimizda ajoyib muxlislar bor. Ularning hurmati uchun faqat g'alaba uchun o'ynasang arziydi. Bu yil bir muncha og'ir mavsumni boshdan o'tkazdik. SHunga qaramay, jamoamiz chempionat etakchilariga qarshi munosib o'yinlar namoyish etishga harakat qildi. Bir necha yil avval kuchlilar safida jon saqlash uchun kurashayotgan “Qizilqum”dan endi muxlislar  katta g'alabalarni kutishmoqda.

Viloyatimiz rahbarlari va xomiylarimiz say-harakatlari bilan klub infrastrukturasi bosqichma-bosqich shakllanib boryapti. Yakunlangan mavsum o'ziga xos sinov yili bo'ldi. Afsuski, ayrim muhim o'yinlarda qimmatli ochkolarni boy berdik. Agar hammasi muxlislar kutganidek bo'lganida hozir jamoamiz sovrindorlar qatorida bo'lardi.

Bir so'z bilan aytganda, yakunlangan mavsum Navoiyda kuchli jamoa shakllanishi uchun o'ziga xos poydevor bo'ldi. Kelasi yili futbol klubimiz uchun yangi va zamonaviy qarorgoh barpo etilishi rejalashtirilmoqda. Viloyat futbol federaciyasi hamda xomiylarimiz bilan maslahatlashgan holda klubimiz qoshidagi bolalar va o'smirlar futbol maktabi ishini yanada jonlantirishni rejalashtirganmiz. Yuqori natijaga bir kunda erishib bo'lmaydi. Buning uchun hali katta hajmdagi yumushlarni amalga oshirish lozim. Ishonamanki, viloyatimizda jamoamizga xayrixoh va qo'llab-quvvatlayotgan insonlar bilan yaqin yillarda buni albatta uddalaymiz.

“Qizilqum” PFK Matbuot xizmati.