Hamidjon Aktamov: Bugun irodali g'alabaga erishdik

-Bugun qiyin kechgan bahsda muhim uch ochkoni qo'lga kiritdik, - deya so'z boshladi Hamidjon G'ulomovich. - Bizni butun uchrashuv davomida uyushqoqlik bilan qo'llab-quvvatlab turgan muxlislarimizga rahmat! O'z darvozangdan birinchi bo'lib to'p olib chiqib,  yakunda g'alaba qozonish hech bir jamoa uchun oson emas. Qolaversa, bugungi o'yin oldidan tarkibimizda jiddiy yo'qotishlar bor edi. Darvozabon Erkin Jabborov hamda himoyachi Alisher Yusupovlarni jarohati tufayli boshlang'ich tarkibga kirita olmadik. Himoyachi Akmal Rustamov hisobidagi sariq kartochkalar to'rttaga etganligi, yana bir yarim himoyachimiz SHerali Jo'raev qizil kartochka olganligi bois, bugun jamoamizga yordam bera olishmadi. SHunga qaramay, anchadan beri zaxira o'rindig'ida o'tirgan boshqa yigitlarimizga bugun imkon berishga qaror qildik. Ular esa o'zlarini ijobiy tomondan ko'rsatdi va ishonchimizni oqlashdi. Qisqacha aytganda, bugun irodali g'alabaga erishdik.

Bunaqa uchrashuvlarda bitta xato ham jamoani og'ir ahvolga tushirib qo'yishi mumkin.  Andijon ham tajribali murabbiy va futbolchilarga ega jamoa. SHunga qaramay, yigitlarimiz yaratilgan vaziyatlardan unumli foydalanib, muhim uch ochkoni qo'lga kiritganidan xursandmiz.

Keyingi paytlarda saviya borasida chempionat klublari o'rtasidagi farq tobora kamayib boryapti. Ayni paytda barcha jamoalarga qarshi g'alaba uchun o'ynasa bo'ladi. Afsuski, oxirgi o'yinlarda futbolchilarimizning keraksiz vaziyatlarda sariq kartochka olayotganliklari bizni xavotirga solmoqda. Tartib-intizom borasida hali qiladigan ishlarimiz talaygina.

Muhimi, oxirgi ikki uchrashuvdagi omadsizlikdan so'ng, bugun jamoamiz yana g'alaba qozondi. Andijonda bo'ladigan O'zbekiston kubogi nimchorak final javob uchrashuvida ham muxlislarimizga g'alaba taqdim etish uchun kurashamiz.

Qizilqum PFK Matbuot xizmati.