"Hafta yulduzlari"
01 apr 2014 07:00
Yangiliklar


"Hafta yulduzlari"
O'tgan haftada o'zining chiroyli va yorqin o'yinlari bilan yodda qolgan futbolchilar bilan tanishtirib o'tamiz. Kuchli beshlik chempionatlarida bir qator muhim va katta qarama-qarshiliklar bo'lib o'tdi. O'sha uchrashuvlarda o'zini har tomonlama ko'rsata olgan futbolchilar, yani "Hafta yulduzlari"ni aniqlaymiz.
Demak darvozada "Atalanta" posboni Andrea Konsilini tanladik. Ushbu posbon "Atalanta"ning "Bolonya" ustidan g'alabasiga munosib hissa qo'shdi. Bu darvozabon bir qator "seyv"lar uyushtirib, o'z darvozasini ishonchli qo'riqlay oldi. "Atalanta" ushbu mavsumda evrokuboklar uchun kurashmoqda. Agarda jamoa evrokuboklarga yo'llanma beruvchi o'rinni egallay olsa, unda Andrea Konsilining xizmatlari bo'lishi tabiiy.
Gulam Fauzi. Himoyada Gulam Fauzi o'z o'rnini topa oldi. "Napoli" himoyachisi "Yuventus" bilan bo'lgan bahsda juda ishonchli harakat qildi va jamoasining hujumlarida ham faollik ko'rsatgani maqtovga loyiq.
Daniel Karvaxal. Ushbu himoyachi "Real" jamoasining g'alabasiga o'zining o'lushini qo'sha oldi. Ushbu o'ng qanot himoyachisi nafaqat himoyada, balki hujumlarda ham qo'shilib turdi va raqib darvozasiga gol kiritishga ham erishdi.
Alvaro Dominges. "Borussiya M" himoyachisi Alvaro Dominges ham bu haftada qolgan himoyachilardan ajralib turdi va raqib jamoa darvozasiga gol urishga ham erishdi. Odatda bu futbolchi raqib posbonlarini ko'p ranjitib turadi. Lekin bu safar nafaqat raqib posbonini ranjitdi, balki hujumchilarga ham ortiqcha imkoniyat bermadi.
Endi o'rta chiziq. Yarim himoyachilarga navbat.
Marko Roys. "Borussiya D"ning tinib-tinchimas futbolchisi bu turda haqiqiy qahramonga aylandi. Marko Roys jamoasi 2:0 ga yutqazib turgan paytda o'zini ko'rsata oldi. "SHtutgart" darvozasiga ketma-ket uchta to'p yo'llab, xet-trik qayd etdi va jamoasiga irodali g'alabani taqdim etdi. Ortiqcha izohga ne hojat!
Raxim Sterling. "Liverpul" tarkibida "Tottenxem" bilan bo'lgan o'yinda Sterling o'zining faolligi bilan ajralib turdi. Ushbu vinger yaqin kelajakda katta futbol yulduziga aylanishi mumkin. "Tottenxem" himoyasini shu kuni ushbu futbolchi ancha ter to'kishga majbur eta oldi.
Kaka. "Milan" jamoasining ushbu turdagi eng yaxshi futbolchisi Kaka "Hafta yulduzlari" qatoridan joy olishga munosib. Ushbu yarim himoyachi raqib darvozasi tomon ikkita zarba yo'lladi va barchasi gol bilan yakunlandi.
Garet Beyl. "Real"ning "Rayo Valekano" ustidan qozonilgan g'alabaning asosiy sababchisi bu Beyl. Garet Beyl raqib darvozasiga ikkita gol yo'lladi va "Real"ning uch ochkoni qo'lga kiritishida asosiy rolni o'ynadi.
Endi navbat snayperlarga.
Ueyn Runi. "Manchester Yunayted"ni mag'lubiyatdan g'alaba sari boshlagan futbolchi Ueyn Runi bo'ldi. Avvaliga penaltidan hisobni tenglashtira oldi va oradan bir necha daqiqa o'tib, jamoasining va o'zining ikkinchi golini kiritdi. SHu kiritilgan gollardan keyin MYU yana ikki bor raqib posbonini ranjita oldi. Ueyn Runi esa g'alabaga asosiy sababchi bo'ldi.
Klaudio Pisarro. Nihoyat "Bavariya" chempionlikni rasmiylashtirganidan so'ng, Gvardiola ushbu qariya futbolchiga asosiy tarkibdan joy berdi. "Xoffenxaym"ga qarshi kechgan o'yinda jangovor durangdagi asosiy qahramon aynan Klaudio Pisarro bo'ldi. Odatda kam o'ynaydigan, ammo maydonga tushsa golsiz tark etmaydigan ushbu futbolchi jamoasining barcha golida qatnashdi. "Bavariya" ochko yo'qotgan o'yinda faqatgina shu futbolchiga hech qanday etiroz yo'q. Ikkita gol va bitta golga hammualliflik.
Luka Toni. Yana bir qariya hujumchi bu turda porladi. Yoki porlashda davom etmoqda. "Verona" ham "Atalanta" singari evrokuboklar uchun kurash olib bormoqda Italiya chempionatida. "Verona"ning snayperi Luka Toni shu kuni raqib darvozaboni ikki bor ranjitdi. 40 yoshni qarshi olay deb turgan ushbu futbolchi to'purarlar poygasida ishtirok etmoqda. Qoyil Luka Toni!
SHahboz Beg'amov

Fikrlar