Farrux Zokirov shogirdlari joriy mavsum yakunlari bo'yicha turnir jadvalida uchinchi o'rinni egallab bronza medallariga ega chiqishdi. Aytish kerakki, Farg'ona futzali tarixida hali bunday natija qayd etilmagan edi.

So'nggi turda farg'onaliklar Toshkentda mehmon bo'lishdi. "Bunyodkor"ga qarshi bahs yuritgan Vodiy jamoasi ilk o'yinda 5:3 hisobida mag'lub bo'ldi. Ushbu bellashuvda Xushnur Erkinov dubl qayd etgan bo'lsa, Husniddin Nishonov bir marta raqib darvozasiga aniq yo'l topdi.

Ertangi bahsda mehmonlar dastlabki o'yin natijasi shunchaki omadsizlik ekanligini isbotlashdi. Bugun bo'lib o'tgan raqobatda "Neftchi" "Bunyodkor" darvozasiga 7 marta aniq yo'l topdi! Mezbonlar esa 3 marta javob golini kiritishdi. G'ulom Mamajonov hamda Husniddin Nishonovlar dublga erishdilar. Shuningdek, Said Rizo Mirsharofov hamda Xushnur Erkinovlar ham o'z nomlarini qaydnomaga yozdirib qo'yishdi. Mavsum o'rtasidan boshlab "Neftchi"ning asosiy darvozaboniga aylangan Elyor Domlaev allaqachon muxlislarning yoqimtoyiga aylanib ulgurdi. Darvozabon "Bunyodkor"ga qarshi so'nggi tur o'yinida penaltidan gol kiritib, tarixiy mavsumning so'nggi to'piga egalik qildi. Yakuniy hisob, 7:3, "Neftchi" g'alabasi!

Bellashuvdan so'ng farg'onaliklar katta murabbiyi Boburbek Madaminov ortda qolgan tarixiy mavsum borasida o'z fikrlarini bildirib o'tdi:

- Biz yangi tarix yaratdik. Ilgari Farg'ona futzal jamoalari Respublika miqqiyosida bunday natijalar qayd etishmagan edi. Biz viloyatimiz sharafini munosib himoya qilganimizdan xursandmiz. Ochig'ini aytish kerak, og'ir mavsum o'tkazdik. Yil yarmida jamoa safini bir qator mahoratli futzalchilar tark etishiga qaramay yanada olg'a bordik va natijalarni yaxshiladik. Erishilgan muvaffaqiyatlarning barchasi mehnatlarimizning samarasidir. Shu o'rinda, mavsum davomida bizni har tarafla qo'llab-quvvatlab kelgan klubning futbol jamoasi bosh murabbiyi Bahrom aka Haydarov, klub rahbariyatidan Abdusamad aka Nazirdinov hamda Zoxid aka G'ofurovlarga futzal jamoamizning xar bir azosi nomidan rahmat aytmoqchiman, - dedi Boburbek Madaminov

Futzal. "Neftchi" tarix yaratdi