Fotomaqola. MTJ tayyorgarlikni boshladi yoxud "Jar"da jala quydi

Mirjalol Qosimov boshchiligidagi terma jamoamiz "Jar" o'yingohida kecha yig'inning dastlabki kunidagi mashg'ulotlarni o'tkazdi. Mashg'ulot soat 18:00da boshlandi. Futbolchilar maydonga chiqib kelishlari bilanoq sharros yomg'ir qo'yvordi.

Kechagi mashg'ulotda yig'inga chaqirilgan 24 futbolchidan 22 nafari qatnashdi. Ikki legioner futbolchilarimiz Server Jeparov va Sanjar Tursunovdan tashqari barcha "Jar"da terma jamoa bilan birga edi. "Krasnodar" yarim himoyachisi Odil Ahmedov garchi kecha jamoa bilan birga bo'lgan bo'lsada mashg'ulotlarda ishtirok etmadi. SHuningdek, "Bunyodkor", "Nasaf" hamda "Paxtakor" azolari: Sardor Rashidov, Akmal SHorahmedov, SHohruh Gadoev, SHuhrat Muhammadiev, Farruh Sayfiev, Igor Sergeev va Egor Krimec kuni kecha O'zbekiston chempionatida tur o'yinlarini o'tkazganlari bois alohida tartibda engil yugurish va tiklanish mashqlarini bajarishdi. Ularga bu borada SHuhrat Maqsudov boshchilik qildi.

Akbar To'raev va Eldor Suyunov esa hech qanday cheklanishlarsiz mashg'ulotlarda ishtirok etishdi. Darvozabonlar murabbiyi Abdusattor Rahimov har uchchala kiper: Ignatiy Nesterov, Eldor Suyunov va Akbar To'raev bilan o'z dasturi bo'yicha ish olib bordi.

Aleksandr Volkov va Baxtiyor Ashurmatov qolgan barcha futbolchilarga maydonda jismoniy mashqlarni bajartirishdi. SHuningdek, mashg'ulotning ikkinchi qismida futbolchilar to'p bilan ishlashdi.

Mirjalol Qosimov yig'inning ilk kuni bo'lganligi uchun futbolchilarga og'ir yuklamalarni bajartirmadi va asosan engil mashqlarga etibor qaratildi.

Kuni kecha bu futbolchilar maydonda bir-birlariga qarshi to'p tepishgan edi. Lekin MTJ safida ular aka-uka, do'st, bitta katta oila bo'lib bosh maqsad sari olg'a intilishadi. Suratdagi futbolchilar terma jamoamizning kelajagi, yangi avlodi desak mubolag'a bo'lmaydi. Ulardan umidimiz katta...

Mirjalol Qosimov Odil Ahmedov bilan juda ko'p suhbat qurdi. Odil terma jamoamizning etakchi futbolchisi va Qosimov unga o'yin falsafamizni yaxshilab tushuntirib, miyasiga singdirib borayotgan bo'lsa ajab emas. Odil hozirda o'zi to'p surayotgan Rossiya o'lkasida 2018 yili bo'lib o'tadigan mundialga olib chiqishda ko'maklashishi lozim. Bu borada aynan Ahmedov bizning asosiy "quroli"miz bo'lishi aniq

"Bunyodkor" - "Nasaf" o'yinida o'zaro tortishib qolgan Farruh Sayfiev va Akmal SHorahmedov o'rtasidagi nizoga chek qo'yildi. Har ikkala futbolchi ham bir-biridan uzr so'rab yarashib olishdi. Terma jamoa lagerida barchaning kayfiyati alo va hamma bir-biri bilan juda inoq. Mirjalol Qosimov Sayfiev va SHorahmedovning o'zaro yarashib olishganini "Eshitdik-da" ruknida bervorila, deb hazillashib barchani kayfiyatini yanada ko'tarib qo'ydi. Terma jamoa ustozi aytib o'tganidek, futbol bu shashka emas. Futbolda ehtiros va asablarni asrash qiyin. Futbolda bunaqangi holatlar uchrab turadi, bu tabiiy. Ha-ya, biz Sayfiev va SHorahmedovning yarashib olishganini nafaqat "Eshitdik-da", balki o'z ko'zimiz bilan "ko'rdik-da"...)

Vitaliy Denisov mashg'ulotlarda astoydil ter to'kdi

Terma jamoamizning eng kurashchan "uchligi": SHavkat Mullajonov, Bahodir Nasimov va Azizbek Haydarov

Suratda "Lokomotiv" klubi azolari va Eron klublarining ikki nafar futbolchisi...

Kechagi "Jar"dagi jaladan mana bunday tarzda himoyalanish mumkin edi...

Mashg'ulotning to'liq fotolareyasini quyida tomosha qilishingiz mumkin.

SHahboz Beg'amov