Farhod Nurullaev: "Bugun qarshi hujumda o'ynab, natijaga erishishni maqsad qilgandik"

O'yin haqida

- O'yinni ko'rdinglar, har ikki jamoa uchun og'ir o'tdi. Biz himoyadan o'ynab, qarshi hujumda natijaga erishishni maqsad qilgandik. "Nasaf" jamoasi bir kishi kam bo'lib qolganidan unumli foydalana olmadik. Baribir, bu jamoaning o'z darajasi bor. Gol juda ajoyib zarba evaziga urildi, bunda jamoamiz vakillarini ayblamagan bo'lardim. Yigitlar bugun yomon harakat qilishmadi.

- Jamoa bosh murabbiyi Jamshid Saidov nega bugun o'yin qaydnomasiga kiritilmadi?

- Bosh murabbiyda kartochkalar sabab diskvalifikaciya yuzaga keldi. SHu bois bugun qaydnomaga kiritilmadi.

- Jamoa bosh murabbiyi o'yin bo'yicha sizga ko'rsatmalar berib turdimi?

- Albatta, bosh murabbiy ko'rsatmalar beradi. Tanaffus vaqtida bizga ikkinchi bo'limda amalga oshiriladigan ishlar haqida o'z tavsiyalarini berdi.

- Biz ko'rdik, Jamshid Saidov media tribunada telefon orqali murabbiylar shtabiga ko'rsatmalar berib turdi. Lekin ikkinchi bo'lim o'rtalarida deyarli zaxira o'rindig'igacha bordi. Bunga qanday izox berasiz?

- O'yin jadallashib ketdi. Emociyalar junbushga keldi, harorat ortdi. Bosh murabbiy natijaga asosiy javobgar va unda ham emociyalar bo'lishi mumkin.

- "Qizilqum" yoshlar tarkibidan asosiy jamoaga jalb etilishi mumkin bo'lgan futbolchilar bormi?

- Hozir Diyor Rahmatullaevni asosiy tarkibga jalb etib borayapmiz. Iqtidorli yoshlar bor. 4 nafari olimpiada uchun vodiy jamoasiga jalb etilishdi. Kelgusida asosiy tarkib jamoasida o'ynashi mumkin bo'lgan yoshlarimiz bor.

- Gruziyalik legionerlar nega zaxirada qolayapti?

- Birida jarohat bor. Kuxianidzeni ikkinchi bo'limda yangi kuch sifatida maydonga tushirish rejamiz bor edi. Ketma-ket o'yinlar tufayli charchoq bo'ladi.