Farhod Magometovdan eksklyuziv intervyu (1 aprel hazili!)

Bo'lib o'tgan o'yinlarda har holda xulosa chiqarishga arziydigan voqealar sodir bo'ldi. Yaqinda birinchi liga bahslari ham start oladi. Ayni paytda PFLda ish qizg'in. Endi to mavsum oxirigicha shunday davom etadi. Oliy ligada 3-tur o'yinlari yakuniga etganidan so'ng mazkur tashkilotni boshqarayotgan Farhod Magometovdan intervyu olishni lozim topdik. Intervyu mobaynida Magometov bir qator savollarga javob berib o'tdi. Quyida ushbu suhbatni o'qib fikr bildirishingiz mumkin.

-   Farhod aka, mana oliy ligani ham boshlab oldik. Joriy mavsum siz uchun qanday boshlandi?
-   Avvalo bizni yo'qlab ofisimizga kelganingiz uchun rahmat. SHu o'rinda menga Farhod aka emas, balki Farhod Abdualievich deb murojaat qilishingizni so'rayman. Har holda men PFL rahbariman, shunday ekan, atrofdagilarning shunga yarasha munosabatda bo'lishlarini xohlayman. Men ko'chada yo uyda Farhod akaman, ishda esa Farhod Abdualievich. Marhamat, endi savollarga o'tavering.

-   Tushunarli, Farhod Abdualievich. Demak, birinchi savolim quyidagicha, yangi futbol mavsumi Siz uchun qanday boshlandi?
-   SHaxsan men “Nasaf” bilan “Lokomotiv”dan OCHLning birinchi bosqichidayoq chiqib ketishni kutmagandim. Bu esa oliy liga taqvimini tuzayotganimizda bizga xalal berdi. Biz allaqachon yillik taqvimni tuzib qo'ygandik, ammo bu ikki jamoaning qoniqarsiz ishtiroki taqvimni boshqatdan ko'rib chiqishimizga sabab bo'ldi. Endi savolning asosiy qismiga keladigan bo'lsak, yangi mavsum men uchun yangi loyihalar bilan boshlandi. Jurnalistlar u-bu deyaverib oxiri Superkuboni ham o'tkazib oldik. To'g'risini aytsam, elkamdan tog' ag'darilgandek bo'ldi.
 
-   Aslida Superkubok bilan bog'liq savolni bermoqchiydim. Ammo o'zingiz gap boshlab qoldingiz. Aytganingizdek, Superkubokni ham o'tkazib oldik. Hammasi yaxshi bo'ldi-yu, lekin shu taqdirlash marosimida...
-   Men sizni tushundim. Kubokning bitta qulog'i sinib qoldi demoqchisiz shundaymi? Bu borada menga yoki qo'l ostimdagilarga etiroz bildirishning hojati yo'q deb o'ylayman. CHunki kubokning qulog'ini men sindirganim yo'q, balki “Bunyodkor” futbolchilari sindirib qo'yishdi. Kubok bo'lganidan nozik materialdan ishlangan-da, axir bu sizga temirmas-ku. Sal ehtiyot bo'lib ushlashganida sinmasdi.

-   Esingizda bo'lsa, PFL Kubogining finalidan keyin...
-   Aytyapman-ku, sizni tushundim deb. “Mashal” futbolchilari ham kubokning bitta qulog'ini sindirib qo'yishgandi demoqchisiz, to'g'rimi? Lekin o'shanda ham aybdor men bo'lmaganman. CHunki Vanievga kubokni topshirayotganimda qulog'i sinmagandi. Echinish xonasida nima bo'lganidan esa xabarim yo'q. Siz - jurnalistlar nuqul pashshadan fil yasaysizlar. Kubokning qulog'i singan bo'lsa bo'pti-da, shungayam ota go'ri qozixonami.

-   Mayli, singan quloqni qo'ya turaylik, siz aytgancha bo'la qolsin. Ammo PFL Kubogidan keyin ham, Superkubokdan keyin ham siz sovrinni yutgan jamoa bilan rasmga tushmadingiz. PFL fotosuratchisi Hasan aka sizni rasmga olaman deb rosa halak bo'ldi.
-   Yana pashshadan fil yasayapsiz. “Mashal” PFL Kubogini yutgan kuni havo sovuq edi, uni ustiga yomg'ir aralash qor yog'di. Natijada futbolchilar ho'l bo'lib ketishdi, men esa ularni to'g'ri tushunib rasmga tushmay qo'ya qoldim. Lekin shu o'rinda bir gapni aytishim mumkin, agar “Mashal” bu yil O'zbekiston Kubogini yutadigan bo'lsa, ular bilan albatta suratga tushaman. SHuni bemalol muxlislarga etkazib qo'yavering.
 
-   Jurnalislarni yana bir savol qiziqtiryapti. Siz PFL rahbarisiz, lekin oliy liganing ayrim o'yinlariga komissar etib tayinlanyapsiz. Bu siz uchun g'alati emasmi?
-   Nimasi g'alati ekan? OFK bizdan har o'yinga komissar bo'lishi kerakligini talab qilyapti. Nailoj, odam kamligidan o'zim ham komissar bo'lib turibman. Mana “Nasaf”ning uy o'yiniga Hakamlar qo'mitasidan Borbur Haydarov borib komissarlik qildi. Buning nimasi yomon? Xalqimizda yigit kishiga qirq hunar oz degan gap bekorga aytilmagan.
 
-   SHundayku-ya, masalan bizda Olim Arifov bor. U OFK komissari, ingliz tilini ham biladi. Lekin nima uchun uni oliy liga o'yinlariga komissar etib yubormayapsiz?
-   Jurnalistlar tirnoq ostidan kir qidirishga juda ustasizlar-da. Olim Arifov bormasa, mana Frolov, CHernikov, Lyotkin singari mutaxassislarimiz bor. Ularni yuboryapmiz-ku. Qolaversa, yaqinda PFL matbuot kotibi Grigoriy Rtveladzeni ham komissar sifatida o'yinlarga yuborishni yo'lga qo'ydik. Hadeb xona ichida siqilib o'tirgandan ko'ra o'yinlarga borib, futbolning toza havosidan nafas olib kelgan yaxshi emasmi? Yana savollar bormi? Agar yo'q bo'lsa, ketmoqchi edim. Hali tushlik qilishim kerak.

-   Hozir, ozgina qoldi. Oliy liga klublari to'laydigan badal puli miqdori 10 million so'mga oshibdi. Buning sababi nimada?
-   O'zingiz ko'ryapsiz, futbolchilar va murabbiylarning oyligi yildan yilga oshmoqda. Ko'tarma pullarini aytmasa ham bo'ladi. Xalqimizda zamon senga boqmasa, sen zamonga boq degan gap bor. SHuning uchun atigi 10 millionga oshirdik. Bundan klublarning bir joyi kamayib qolgani yo'q.
 
-   Yil boshida oliy liga stadionlarida vay-fay (simsiz internet) bo'ladi degan edingiz. Lekin ayrim stadionlarda haligacha internet yo'q.
-   Sizni tushundim. Ha, chindan ham shunday talabni qo'yganmiz. Marhamat, qaerda bepul internet bor bo'lsa, bemalol foydalanavering. Yo'q bo'lsa, unda modem olib ishlatishga to'g'ri keladi. SHu bilan muammoni hal etish mumkin.
   
-   Bu yil ham yurtimizga OFK taftish komissiyasi tashrif buyuradimi?
-   Iltimos, shularni eslatmay turing. Ular kelishni boshlaganidan beri OCHLdagi o'rinlarimiz kamayib ketdi. Ataylab kamchilik topish uchun kelishadimi-ey. Agar keladigan bo'lishsa, xodimlarimga aytib qo'ymoqchiman, meni bu erda ishlamaydi deb aytvorishadi.
 
-   Farhod Abdualievich, oxirgi savol. PFL saytida bu yildan birinchi liga protokollari ham to'liq berilar ekan. SHu rostmi?
-   Ha, shunday gap bor va men bu haqda Grishaga (PFL matbuot kotibi Grigoriy Rtveladze nazarda tutilmoqda) qattiq tayinlab qo'ydim. Bu yildan birinchi ligani ham saytimizda batafsil yoritib bormoqchimiz. Har bir jamoani tarkiblari bilan beramiz. CHunki birinchi liga ham o'zimizniki, hozir etibor qaratmasak, qachon qaratamiz.

-   Mazmunli suhbatingiz uchun rahmat. Ishingiz doim baroridan kelsin.   
-   Sizga ham rahmat.  

No'monjon Sobirov suhbatlashdi.