Farhod Abdumavlonov: "Standart vaziyatlar bizning asosiy qurolimiz"

Ilk o'yinda 1:1 hisobidagi durang qayd etildi. Ikkinchi bahsda esa vakillarimiz 11:2 hisobida zafar quchishdi. Biz ikkinchi o'yinda 4ta gol urgan Farhod Abdumavlonov bilan suhbatlashdik.

-  Bugungi o'yin haqida o'z fikrlaringizni bildirsangiz?
-  Tojikistonga qarshi ikkinchi uchrashuvni o'tkazdik, birinchi bahsda (1:1) jangovar durang qayd etdik. Ilk uchrashuvda ustunlik biz tomonda bo'lgan bo'lsada ko'p vaziyatlardan foydalana ololmadik. Bugun esa 11:2 hisobida zafar quchdik. Kechagi urilmagan gollarni bugun raqib darvozasiga joylab qo'ydik. Murabbiyimizning barcha aytgan gaplarini so'ssiz bajardik. Oldinda Vetnam terma jamoasiga qarshi o'rtoqlik uchrashuvi turipti. Bugungi bahsdagi xatolarimiz ustida ishlab Vetnam terma jamoasiga qarshi bundanda yaxshi o'ynashga harakat qilamiz. Osiyo chempionatigacha yuqori darajada etib borishimizga ishonaman.

-  Tojikiston terma jamoasi haqida qanday fikrdasiz?
-  Tojikiston terma jamoasi barcha MDH davlatlari kabi o'ynaydi. Tojikiston va Qirg'iziston terma jamoasining o'yin uslubi bir-biriga o'xshash bo'lgani uchun mana shu ikkita o'rtoqlik uchrashuvi tashkil etildi. 

-  Tayyorgarlik jarayonida nimalarga ko'proq etibor qaratyapsizlar?
-  Asosan jismoniy holatimiz va standart vaziyatlardan to'g'ri foydalanish borasida ko'proq ishlayapmiz.   

-  Birinchi o'yinimizni Saudiya Arabistoni terma jamoasiga qarshi o'tkazamiz. Ushbu terma jamoa haqida biron bir malumotga egamisizlar?
-  Saudiya Arabistoni terma jamoasiga qarshi birinchi o'yinimizni o'tkazishni kutmagandik, chunki Quvayt terma jamoasini OFK chempionatdan chiqarib tashlagan.  SHuning uchun Saudiya Arabistoniga qarshi o'ynaymiz. Bu terma jamoa haqida bizda hozircha malumotlar yo'q, balki murabbiylarimizda malumotlar bordir lekin bizga aytishmadi. Buni o'yindan bir kun oldin aytishadi.

- Dilshod Irsaliev bilan suhbatlashganimda jamoadoshingizning aytishicha Iordaniyaga qarshi o'rtoqlik o'yini Saudiya Arabistoniga qarshi tayyorgarlik vazifasini o'tab berar ekan.
-  To'g'ri aytipti Saudiya Arabistoni terma jamoasining o'yin uslubi Iordaniya termasining o'yin uslubiga o'xshash, sababi arab davlatlarining o'yin uslublari bir xil bo'ladi deb o'ylayman. Iordaniya terma jamoasiga qarshi o'rtoqlik uchrashuvi birinchi bahsga tayyorgarlik vazifasini o'tab beradi.  

-  Qura biz uchun omadli kelganmi?
-  Biz uchun omadli keldi deb o'ylayman, chunki tanish bo'lgan terma jamoalar bizning guruhimizga tushgan.
   
Jahongir Sotvoldiev suhbatlashdi.