Farg'ona derbisiga o'zgacha anons

Bu o'yinlarga murabbiylar, futbolchilar va muxlislar alohida tayyorgarlik ko'radi. Milan derbisi, Manchester derbisi, London derbisi...Hattoki Istanbul va Tehron derbilari ham juda “qaynoq" o'tadi. Tehrondagi "“Ozodi" stadioniga "Istiqlol" va "Persepolis" jamoalari o'rtasidagi o'yinga 100 mingga yaqin muxlislar kiradi.

Bizda bugun O'zbekiston Pro ligasida ana shunday derbilardan biri Yaypandagi "O'zbekiston" stadionida bo'lib o'tadi. Bu o'yinga ham qiziqish o'ta yuqori. Birinchi sababi derbi ekanligi. Ikkinchi sababi har ikkala jamoa ham o'tgan turda mag'lubiyatga uchrab ochko yo'qotgani, bugun ikkalasi ham faqat g'alaba uchun maydonga chiqadi. Uchinchi sababi murabbiylar. Har ikkala jamoani ham futbolchilik davrida "Neftchi" bilan ko'plab g'alabalarga erishgan, bir-biri bilan aka-ukadek bo'lib qolgan, Xirosima-94 chempionlari Abdusamad Do'rmonov va Sergey Lebedev boshqarayotgani. Bu ikkala murabbiyni o'zaro raqib sifatida ko'rish o'yinga bo'lgan intrigani yanada oshirib yuboradi.

Xullas ming marta o'qigandan bir marta ko'rgan yaxshi. Bugun soat 16:30 dan boshlanadigan Farg'ona derbisini championat.asia saytida va "Futbol TV" telekanalida kuzatib borish mumkin.

Farhodjon Uzoqov