Evropani zabt etayotgan yangi top forvard haqida
30 jan 2023 21:10
Yangiliklar

Evropani zabt etayotgan yangi top forvard haqida

29 yanvar kuni "Napoli" o'ta muhim bahsda "Roma"ni (2:1) engdi, ayniqsa birinchi gol juda chiroyli chiqdi.

17-daqiqada Xvicha Kvaracxeliyaning uzatmasidan keyin Osimxen to'pni o'ziga o'nglab, keyingi harakatda Rui Patrisiu qo'riqlayotgan darvozani "o'qqa tutdi".

Gol har ikki jamoa murabbiylarini hayratda qoldirdi.

Luchano Spalletti o'sha vaziyatni quyidagicha izohladi: "Bu golda hamma narsani ko'rish mumkin: texnik mahorat, to'p bilan ikki raqib qurshovida ham nozik harakatlarni amalga oshira olish va u shu qadar kuchli zarba berdiki, xuddiki oyoqda emas, to'potar qurilmadek tasavvur uyg'ondi".

Joze Mourinyu esa Osimxenni bir yo'la Drogba bilan solishtirdi: "Osimxen ham o'sha darajadagi o'yinchi, ammo Dide yiqilavermasdi. Agar Viktor Angliyaga borishni istasa, o'zgarishi zarur. Sababi Italiyada uning qiliqlariga ko'z yumishmoqda, Angliyada esa qiyinroq bo'ladi".

"Napoli" – "Roma" uchrashuvi vaqtidayoq Joze Mourinyu va Viktor Osimxen qo'l berib ko'rishib, bir-ikki og'iz fikr almashishga ham ulgurishdi.

O'indan keyingi matbuot-anjumanida Mourinyu dialogda nima haqida gap ketganini oshkor etdi:

"Men unga o'ta chiroyli gol urganini va bunday mug'ombirlik ishlatib yiqilavermasligi kerakligini aytdim. Fantastik gol, u shu mavsum doirasidagi o'tgan uchrashuvimizda ham o'xshash gol muallifi bo'lgandi, fantastik futbolchi. Lekin u mug'ombirlik bilan jarima zarbalari ishlashga urinishni to'xtatishi zarur".

Osimxenning statistikasi — top

2022/23-mavsum Viktor Osimxen uchun "Napoli" tarkibidagi eng yaxshisi: 16 o'yinda 14 ta gol va 3 ta golli uzatma. Gol+pas tizimida Osimxen bundan yaxshiroq natijaga faqat bir marta erishgan: 2018/19-yilgi mavsumda "SHarlerua" safida Viktor 34 uchrashuvda 19+3 ko'rsatkich qayd etgandi. Xuddi shuncha (17) ochkoni hujumchi "Lill"da 2019/20-yilgi mavsumda (13+4) rasmiylashtirgan, biroq u mavsum nigeriyalik 27 bahsda maydonga tushgandi.