Etim qolgan 95lar!

Klub rahbariyati nima sababdan bunday qarorga kelganidan malumotga ega emasmiz. To'g'ri, Aleksandr Volkov vaqtincha bosh murabbiy vazifasini bajaruvchi sifatida ishlab kelayotgan, natijalar ham chakki emasdi. Biroq kecha jamoani Sergey Lushan qabul qilib oldi.

Klub rasmiy sayti bu haqda xabar ham chop etdi. Lushanning bosh murabbiy etib tayinlanishiga hech qanday qarshiligimiz yo'q. CHunki Sergey Ivanovichni Rossiya futbolidan qaytarib olib kelgan aynan “Bunyodkor” bo'ladi. Aynan “Bunyodkor” unga o'zbek futboli eshiklarini boshqatdan ochdi. Lushan kelgach, shu erda futbolchilik faoliyatini tugatdi va murabbiylikni boshladi.

Klub ozmi-ko'pmi uni o'qitdi, avvaliga alohida guruh bilan ishlagan Lushan keyinchalik “Bunyodkor” futbol maktabi direktori darajasiga ko'tarildi. Bu yildan esa 1995 yilda tug'ilgan futbolchilardan iborat O'zbekiston yoshlar terma jamoasini qabul qilib oldi. 4-5 oycha ishladi ham, ammo kecha “Bunyodkor” bosh murabbiyi bo'ldi.

Ana endi savol tug'iladi: Sergey Lushan bundan buyon “Bunyodkor”ni boshqaradi, lekin unda yoshlar terma jamoamizning taqdiri qanday kechadi? Umuman olganda, Lushan “Bunyodkor” bosh murabbiyi bo'lganidan Mirabror Usmonovning xabari bormi? Agar u kishi xabardor bo'lsa, buni qanday qabul qildilar?

Bizga malum bo'lishicha, bugun O'FF prezidenti murabbiylar kengashini yig'adi va shunda hammasi hal qilinar ekan. Nima bo'lgan taqdirda ham, klub qaror qabul qilib bo'ldi va bundan keyin “Bunyodkor” natijalari uchun Lushan javob beradi. Terma jamoaning Osiyo chempionatidagi ishtiroki uchun kim javob berishi esa bugun malum bo'ladi.

Xabaringiz bor, bu jamoa bilan avvaliga Aleksey Evstafeev ishlab kelayotgandi, biroq tushunarsiz sabablarga ko'ra Evstafeev jamoa bilan xayrlashdi va O'FF o'rniga Sergey Lushanni qo'ydi. Endi yigitlar yangi murabbiyga o'rganamiz degan bir paytda Lushan “Bunyodkor” bosh murabbiyi bo'ldi. Natijada 1995 yilda tug'ilgan futbolchilardan tashkil topgan termamiz otasiz qolgan jamoaga o'xshab qoldi. Aytaylik, Lushan 95 larni boshqarishda davom etgani bilan bor etiborini to'liq shu jamoaga qarata olmaydi. CHunki u endilikda “Bunyodkor” uchun masul. SHunday ekan, katta ehtimol bilan U-19 terma jamoasiga yangi murabbiy tayinlansa kerak.

Bu jamoamiz 9-23 oktyabr kunlari Myanmada o'tkaziladigan yoshlar o'rtasidagi Osiyo chempionatida ishtirok etadi. O'zbekiston o'z guruhida Avstraliya, BAA va Indoneziya bilan bahs olib boradi. “Etim qolgan bolalar”ni u yoqqa kim olib boradi, qanday maqsad uchun kurashiladi, bu kabi savollar hamon ochiqligicha qolmoqda.

Xayrulla Xoliqov.